Konsullik xizmatlari

13-modda.

Faqat O‘zbekiston Respublikasining fuqarosigina konsullik mansabdor shaxsi bo‘lishi mumkin.

14-modda.

Konsul lavozimga tayinlanayotganida O‘zbekiston Respublikasi Tashqi ishlar vazirligidan uning konsullik okrugi belgilab berilgan konsullik patentini oladi.

15-modda.

Konsul konsulxona joylashgan davlatning roziligini (ekzekvaturasini) olganidan keyin o‘z vazifalarini bajarishga kirishadi. Uning bu vazifaga tayinlanganligi to‘g‘risida konsulxona joylashgan davlat ma’murlari xabardor qilinadi.

16-modda.

Agar konsul biron sababga ko‘ra o‘z vazifalarini bajara olmaydigan bo‘lsa yoki uning lavozimi vaqtincha bo‘sh bo‘lsa, konsul vazifalarini bajarish ushbu konsullik muassasasining yoki O‘zbekiston Respublikasining konsulxona joylashgan davlatdagi boshqa konsullik muassasasining boshqa mansabdor shaxsi zimmasiga yoxud shu davlatdagi O‘zbekiston Respublikasi diplomatiya vakolatxonasining diplomatiya xodimlaridan biri zimmasiga yuklatiladi.

17-modda.

Konsul ushbu Ustavda hamda O‘zbekiston Respublikasi hamda konsulxona joylashgan davlat imzolagan xalqaro shartnomalarda nazarda tutilgan vazifalarni bajaradi.

Konsul ushbu Ustavda nazarda tutilmagan boshqa vazifalarni, agar ular O‘zbekiston Respublikasining qonun hujjatlariga va konsulxona joylashgan davlatning qonun hujjatlariga zid bo‘lmasa, bajarishi mumkin.

18-modda.

Konsul o‘z zimmasiga yuklatilgan vazifalarni shaxsan o‘zi bajaradi yoki ularni bajarishni boshqa konsullik mansabdor shaxsiga topshiradi.

19-modda.

Konsul boshqa davlatning konsullik vazifalarini faqat O‘zbekiston Respublikasi Tashqi ishlar vazirligining ko‘rsatmasiga binoan va konsulxona joylashgan davlat roziligi bilan bajarishi mumkin.

20-modda.

Konsul o‘zining konsullik okrugi doirasida konsullik muassasasining faoliyati bilan bog‘liq barcha masalalar yuzasidan konsulxona joylashgan davlat ma’murlariga murojaat etishi mumkin.