Компьютер графикаси

III BOB. OPENGL GRAFIK KUTUBXONASI

3.1. OpenGL grafik kutubxonasi bilan tanishish

OpenGL - ikki va uch o‘lchovli grafika sohasida ilovalar yaratish uchun ancha keng tarqalgan amaliy dasturiy interfeys (API – Application Programming Interface) lardan biri hisoblanadi.

OpenGL (Open Graphics Library – ochiq grafik kutubxona) standarti turli xil platformalarda amalga oshirish uchun kerakli, apparatga bog‘liq bo‘lmagan interfeys sifatida dasturiy ta’minot ishlab chiqarish sohasidagi yetuk firma tomonidan 1992 yilda ishlab chiqilgan va tasdiqlangan. Standartning asosi bo‘lib Silicon Graphics Inc firmasi tomonidan ishlab chiqilgan IRIS GL kutubxonasi hisoblanadi [1, 2, 3, 12, 15].
Kutubxona 120 ga yaqin turli buyruqlardan iborat bo‘lib, dasturchi operatsiyalar va obyektlarni tayinlashda hamda interaktiv grafik ilovalarni yozishda foydalanadi. Bugungi kunda OpenGL grafik tizimini ko‘pgina apparatli va dasturiy platformalarni quvvatlaydi. Ushbu tizim Windows va Linux operatsion tizimlarida ishlovchilar uchun ochiq.
OpenGL kutubxonasining o‘ziga xos xususiyatlari, ya’ni ushbu grafik standartning rivojlanishi va keng tarqalishini ta’minlovchi jihatlar, quyidagilar hisoblanadi:

• 
  Barqarorlik. Standartga o‘zgartirish va qo‘shimchalar kiritish, oldingi dasturiy ta’minotlarda ishlab chiqilganlarning mosligini saqlab qolish ko‘rinishida amalga oshiriladi.
  
• 
  Ishonchlilik va uzatuvchanlik. OpenGL dan foydalanayotgan ilova, axborotlar tasvirlanishini tashkil qilish va foydalanilayotgan operatsion tizim turiga bog‘liq bo‘lmagan holda bir hil vizual natijani kafolatlaydi. Bundan tashqari, ushbu ilovalar ShK larda qanday bajarilsa, xuddi shunday ishchi stansiya va superkompyuterlarda ham bajariladi.
  
• 
  Qo‘llashning osonligi. OpenGL standarti mukammal o‘ylangan tuzilmaga va tushunarli interfeysga ega bo‘lib, boshqa grafik kutubxonalardan foydalanishga nisbatan dastur kodi kamroq bo‘lgan samarali ilovalarni yaratish imkonini beradi. Turli qurilmalar bilan moslikni ta’minlash uchun zaruriy funksiyalar kutubxona darajasida tashkillashtirilgan bo‘lib, ilovalar ishlab chiqishni ancha osonlashtiradi.