Kiyimlarni tozalash va saqlash qoidalari

Қишки кийим ва пойабзалларга зарар етмаслиги учун уларни қандай сақлаш керак?

Кийим ва пойабзалларни олиб қўйишда айрим жиҳатлар инобатга олинмаса, улар нотўғри сақланса, куя тушиши, матонинг ранги ўзгариши каби ҳолатлар кузатилиши мумкин.

Фото: Freepik
Сақлашнинг асосий қоидаси: Кўпроқ ҳаво, камроқ ёруғлик ва намлик
Исталган кийим-кечакни олиб қўйишдан аввал ювиш ва тозалаш ёки кимёвий тозалашга бериш керак. Бу айниқса оч рангли пойабзалларга тааллуқли. Сизга кўринмагани билан доғлар бир неча ойдан кейин намоён бўлиши, шундан кейин кетказиш янада қийин бўлиши мумкин.
Атир ва дезодорант вақт ўтиши билан мато рангини ўзгартириши, овқат доғи эса куя тушишига сабабчи бўлиши мумкин. Кийим-кечаклар ювилганидан кейин яхшилаб қуримагунига қадар уни шкафга қўйишга ёки тахлашга ошиқмаганингиз яхши. Уларни ҳаво ўтмайдиган, қалин полиэтилен пакетларда сақламанг. Ҳаво тегмагани ҳисобига мато сарғайиши мумкин. Матоли қоп ёки ҳаво ўтадиган текстиль қути (коробка)ларда сақланг. Қоғоз пакет ёки эски ёстиқ жилдларидан ҳам фойдаланса бўлади.
Мутахассислар кийимларни сақлашда вакумли қоплардан фойдаланишни тавсия қилмайди. Жой тежаш имконини бергани билан унда жун матосидан тикилган пальто ва курткаларни сақламаган яхши. Бу матога зарар етишига олиб келиши мумкин. Жун матоли кийим-кечакни кийим илгичда сақлаш матонинг шакли бузилиши, чўзилишига олиб келади. Яхшиси тахлаб эски ёстиқ жилди ёки чойшабга ўраб, олиб қўйинг. Кийимларни сақлаш учун 21 даража ҳароратдан мукаммали йўқ. Кийимларни қуёш нури ва намликдан сақлаш кераклиги сабаб ҳам гардероб сифатида балкондаги шкаф ёки ёруғлик тушмайдиган хонадан фойдаланинг.
Нимадан бошлаш керак?
Шкаф ва кийим илгичдаги кийим-кечакларни бир жойга тўплаб уларни учга ажратинг:

• 
  Устки кийимлар: куртка, шуба, пальто;
  
• 
  Аксессуарлар: шапка, шарф, қўлқоп;
  
• 
  Бошқа қалин, жун матосидан тикилган кийимлар: свитер, кардиган ва жакетлар.
  

Киймайдиган ва ювилиши (машинада ювиладиган алоҳида, қўлда ювиладигани алоҳида) керак бўлган кийимларни ажратинг. Кийимларни сақлайдиган жой ёки полкани яхшилаб артиб, чанглардан тозалаб олинг. Қоғоз қути ёки солинадиган нарсани тайёрлаб олинг.