Kitapxana com сайтындағы барлық китаплар тек танысыў ретинде берилген. Китаплар

ҚАЗАҚСТАН
Қазақ ели ханалас халық дедик, 
Әтир гүлин Әмиўдиң алып келдик. 
Алтын күнниң сынығын аспандағы 
Шарайнадай кеўилге салып келдик. 
Байлық, дослық, ән-күйдиң үлкесинде, 
Миллион жулдыз жымыңлар бир кешинде. 
Тоқсан сегиз Бельгия сыйған жердиң 
Кеңлиги бар кеўлинде, иргесинде. 
Алтын дән теңизиндей тың гүрлеген, 
Алма-ата алтын сарай гүңгирлеген. 
Абайдың әрманлары иске асып, 
Қурманғазы мың күй боп гүмбирлеген. 
«Ленин» деген уллы сөз озал бастан 
Кеўлимизге күн болып орналасқан. 
Байқоңыр старт берген корабллер 
Аспанда ай-жулдызға аманласқан. 
Қарағанды, Темир таў-озық устаң, 
Балқаш жазар даңқыңды таза мыстан.

---

Ибрайым Юсупов - Йош
kitapxana.com
- Қарақалпақ әдебиятының электрон китапханасы 121
Миллиард пуд бийдай болып, ғәзийнеме – 
Қуй саўлап, тың патшасы Қазақстан! 
Қонаққа кеўлиң ашық, төр кең болсын. 
Жети ықлым жайғасар жер кең болсын. 
Азаў қазақ ағайын, аманда бол, 
Келешегиң Көкшедей көркем болсын! 
Сентябрь, 1972-ж. Алма-Ата.
ҚАЛТАЙҒА
(Ҳәзил) 
Егер де сен тың болғанда, 
Айдалмай дән болар ең. 
Кемпир қуяш кун болғанда, 
Булт жолатпай турар ең. 
Тың да емес, күн де емес, 
Қалтай болғаның мақул. 
Мың қайғы бир ис питирмес, 
Күлип қалғаның мақул. 
Бала деген жылап түсер, 
Туўылғанда енеден. 
Сен дүньяға келгениңде 
Күлип түстиң билемен. 
Күл, қарындас комедия! 
Күлки малы өрбисин, 
Шурт минезли саран дүнья 
Емлеп алсын нервасын. 

---

Ибрайым Юсупов - Йош
kitapxana.com
- Қарақалпақ әдебиятының электрон китапханасы 122
Декабрь, 1967-жыл. 
Қалтай Мухаммеджанов – қазақтың белгили күлкипаз комик жазыўшысы. (И. Ю.)