Кирисиў. Электр берилис ҳәм электроника пәни хаққында тийкарғы түсиниклер

1 – ЛЕКЦИЯ
Тема: Кирисиў. Электр берилис ҳәм электроника пәни хаққында тийкарғы түсиниклер

1. 
   Кирисиў. Электротехника пәни нени үйретеди
   
2. 
   Өзбекстан Республикасы энергетика системалары
   
3. 
   Электр энергиясының қолланыў тараўлары
   
4. 
   Электр жынжырлары ҳәм оның элементлери
   

Таяныш сөзлер: электроенергетика, электр энергиясы, пайдаланыўшы, Республика энергетика системасы, ГЭС, ЖЭС, бирлескен энергетика системалары, электр шынжыры, шынжыр элементлери, дереклер

1.1. Кирисиў. Электротехника пәни нени үйретеди

Электротехника – бул электр ҳәм магнит ҳәдийселери ҳәм олардан әмелде пайдаланыў ҳаққындағы илим. Электр энергиясы станцияларда электр генераторларында ислеп шығарылады, подстанцияларда өзгертириледи, тармақларға бөлистириледи ҳәм пайдаланыўшыларға жеткериледи. Инсан өмириниң дерлик барлық тараўларында электр энергиясы ислетиледи. Ислеп шығарыў үскенелери тийкарынан электр жүритпеде ислейди. Өлшеўлер ушын электр әспаблар ҳәм үскенелер кең қолланылады. Басқарыўдың ҳәзирги заман автоматикалық тармақлары тийкарынан электр элементлеринде исленген, ЭЕМлер де электр элементлеринде ислейди ҳ.т.б.
Электр машиналарын, трансформаторларды, аппаратларды, реле ҳәм басқаларды ислеп шығыў санааттың тийкарғы тараўларынан бири. Радиотехника ҳәм электроника электротехника менен улыўма базадан пайдаланады.
Электротехника кең мәнисте электр ҳәм магнит ҳәдийселеринен әмелий мақсетте пайдаланыў усылларын үйренетуғын пән. Электротехника көбинесе, мәселелер комплексин үйренеди ҳәм бир қатар тараўларға бөлинеди. Электротехниканың әҳмиетли тараўларынан бири электроэнергетика болып, ол электр энергиясын басқа түрдеги энергиялардан ислеп шығарыў, энергияны узақ аралықларға узатыў, оны пайдаланыўшылар арасында бөлистириў, ҳәмде электр энергиясын энергияның басқа түрлери - механикалық, жыллылық, химиялық ҳәм басқа энергияларға айландырыў мәселелерин көрип шығады.