Kirish,,0'rta asrlar tarixi haqida

Atamalar mazmunini bilib oling

„Grek olovi" - neft va smola aralashmasidan tayyorlangan olov. Olovning „kuchi" uni suv bilan o`chirib bo`lmasligida edi.

Missioner - biror dinga e'tiqod qiluvchi xalqlar orasida boshqa bir dinni targ`ib etuvchi.

Monastir - monaxlar jamoasi foydalanadigan ibodatxona, turarjoy va xo`jalik binolari majmuasi. Monax - bu dunyo noz-ne'matlaridan voz kechgan kishi.
II bob. VI - XI asrlarda Osiyo xalqlari
10-§. Islom dinining vujudga kelishi

Tayanch tushunchalar: Johiliya davri. Islom dini. Islomning asosiy rukn (arkon)lari. Vahiy. Qur'on. Umma. Arablarning yagona davlatga birlashtirilishi.

Arabiston islomgacha bo`lgan davrda. Arabiston yarim orolining katta qismi suvsiz cho`l va sahrolardan iborat. Shu tufayli arab qabilalarining ko`pchiligi ko`chmanchi bo`lib, chorvachilik bilan shug`ullanishgan.

Arablarning cho`l va sahroda kechadigan hayotida tuya alohida o`rin tutgan. Suv nihoyatda taqchil bo`lgan bir sharoitda bu tabiiy hol edi. Arablar uchun tuya suti va go`shti oziq-ovqat, juni esa kiyim-kechak hamda boshpana vazifasini o`tagan. Tuya junidan tayyorlangan kigizlardan chodirlar qurishda foydalanilgan.

Ko`chmanchilar o`z chodirlarida yozning jazirama issig`idan jon saqlaganlar. Arabistonning dehqonchilik uchun eng qulay o`lkasi -Yaman viloyati edi.

Arablar hayotida urug`chilik belgilari kuchli bo`lgan. Ular ko`plab urug` va qabilalardan iborat edi. Bu bo`linish - qabilalararo doimiy urushlarning asosiy omiliga aylangan.

Uzluksiz urushlar faqat vayronagarchilik keltirgan, xolos.

Bundan tashqari, urug`lar o`rtasida xun olish odati davom etardi. Go`dak qiz bolalar tiriklayin ko`mib yuborilar edi. Jamiyatda qonunsizlik, axloqsizlik va zo`ravonlik hukm surardi. Odamlarda uyat tuyg`usi yo`qol-gan edi. Ayni paytda tabaqalanish jarayoni tobora kuchayib borgan. Mol-mulk qabila zodagonlari qo`lida to`plangan, sudxo`rlik avj olgan.

Arab jamiyatidagi islomgacha bo`lgan bu davr tarixga johiliya (jaholat) davri nomi bilan kirgan.