Кичик гуруҳ (3-4 ёш)

Нутқ товуш маданиятини тарбиялаш. Болани аниқ, шошилмай, 
етарлича баланд овозда гапиришга одатлантиришда давом этиш. 
Товушларни тўғри талаффуз этишига эътибор бериш. Сўзга тақлид 
қилувчи товушлардан фойдаланиб, бу сўзларни ҳар хил баландликда ва 
тезликда, унли (e, i, а, о, u, o‘) ва ундошлар (m, n, b, p, t, d, k, g, f, v)ни тўғри 
талаффуз этишни машқ қилдириш. Берилган саволларга аниқ ва тўлиқ 
жавоб беришни ўргатиш; расмда кўрган ёки эшитган бирор воқеани сўзлаб 
беришга ундаш; қисқа эртак ва шеърларни ифодали айтиш кўникмасини 
таркиб топтириш ва чиройли, равон гапириш иштиёқини тарбиялаш. 
Бола “r”, “l” каби айрим товушларни талаффуз этишда қийналса, 
ушбу товушларни тўғри талаффузи бўйича алоҳида машқ қилдириш. 
Луғат иши. Боланинг луғатини уй-рўзғор буюмларнинг номини 
англатадиган отлар (кийим, идиш-товоқ, мебель, ўйинчоқлар); табиат
ҳодисаларини (ёмғир, шамол, қор) айтиб бериш; ўсимликлар (дарахт, ўт, 
гул); сабзавот (сабзи, карам, помидор, бодринг.); мевалар (олма, ўрик, нок, 
олча); уй ҳайвонлари (от, сигир, ит, мушук) ва уларнинг болалари 
(тойчоқ, бузоқ, кучукча); айрим ҳаракатларни ифодаловчи феъллардан 
(артмоқ, пиширмоқ, тайёрламоқ) фаол фойдаланиш; сифатлар (катта-
кичик, қизил, сариқ, кўк, яшил, иссиқ, совуқ, ширин, аччиқ); вақтни 
белгилайдиган равишлар (кеча, бугун, эртага, узоқ, яқин) билан бойитишда 
давом этиш. 
Боланинг теварак-атрофдаги нарса ва ҳодисалар ҳақидаги тасаввур-
ларини кенгайтириш; буюмларнинг шакли, ҳажми, сифати ва ўзига хос 
хусусиятлари ҳақида тушунча бериш орқали сўз бойлигини орттириш. 
Катта-кичик, баланд-паст, кўп-битта каби сўз бирикмаларини 
маъносини тушунтириш ва ўз ўрнида қўллашга ўргатиш. 

---

62