Kasbi bo’yicha O’quv dasturlari to’plami

I.“Tikuvchilik malakalarini takomillashtirish” amaliyotidan mashg`ulotlarni tashkil
etish bo`yicha dastur mazmuni
Kirish
Tikuvchilik texnologiyasi fanidan “Tikuvchilik malakalarni takomillashtirish” amaliyotida asosan tikuvchilik texnologiyasi fanida o`rganilgan mayda detallarga ishlov berish, tikuvchilk buyumlari uzellariga ishlov berish usullarini amalda qo`llagan holda yosh bolalar buyumni tikishdan boshlaydilar. Shu tajribalarni amalda qo`llagan holda chaqaloq va bog`cha yoshidagi bolalar ko`rpachasi to`plamini, maktabgacha yoshdagi bolalar kiyimlari to`plami, to`g`ri bichimli, bo`lakli yubka, tungi ko`ylak, o`smir yoshdagi qiz bolalar ko`ylagi, bluzka, ayollar xalatini, milliy ko`ylak, lozimini, ayollar murakkab fasonli kiyimlari( kostyum-yubka) tikadilar.
Bu turdagi amaliyot asosan o`quv yurtining o`quv ustaxonasida, imkoni bo`lsa tikuvchilik yoki xususiy korxonalarda, yakka buyurtma korxonalarida olib boriladi.
Tikuvchilik malakalarini takomillashtirish amaliyotini tashkil etishda tikuv mashinalarida ishlash, dazmollash ishlarini, tikuvchilik buyumlarini ketma-ketlikda tikish texnologiyasi bo`yicha ko`nikma va malakalar hosil qilinadi. Amaliyot natijasiga ko`ra har bir o`quvchiga mutaxassislik malakasi razryadlari beriladi. Amaliyot o`quv ustaxonalarida olib borilsa, 2-3 razryadlar beriladi. Agar amaliyot ishlab chiqarishda o`tkazilsa, o`quvchi 2–5 razryadli ishni uddalay olsa ixtisos komissiyasi unga shu razryadni berishi mumkin. Bu malaka razryadlari o`quvchining tikish malakalarining mustahkamlanishiga qarab, 3-kurs yakunida o`zgarishi mumkin. Bu o`zgarish albatta maxsus komissiya tomonidan tasdiqlanishi kerak. O`quv yurti bitiruvchilariga qo`shimcha ravishda tikuvchi mutaxassisligi guvohnomasi beriladi. O`quv amaliyotining oxirida o`quvchilar ishlaridan ko`rgazmalar tashkil etiladi va har ikkala kursda ham maxsus ixtisos komissiyasi tomonidan razryad belgilanadi. Amaliyot ishlarini o`tkazishda tikuv buyumlarini loyihalash va badiiy bezash, tikuvchilik materialshunosligi, tikuvchilik texnologiyasi va jihozlari fanlaridan olgan bilimlari asosida olib boriladi. Bu fanlarni o`qitish jarayonida o`quvchilar bilan “Tikuvchilik malakalarni takomillashtirish” amaliyoti mashg`ulotida tikiladigan buyumlarning andazalari tayyorlanadi. Bunday bog`liqlik avvalo fanlararo bog`lanishni to`gri yo`lga qo`yish imkoniyatini bersa, ikkinchidan vaqt tejaladi va o`zlari tayyorlagan andazalarini qanchalik to`g`ri ekanligiga ishonch hosil qiladi.