Касалликлари ва зараркунандаларига қарши

Халқали чириш касаллиги. Бу бактериал касаллик бўлиб, у картошканинг ўсиши ва уни сақлаш пайтида, айниқса ёмғирли пайтларда тез ривожланади. Касаллик уруғлик картошка билан бирга узатилади. Ўсимликларда гуллаш даври сўнгида барглар сарғаяди ва сўлий бошлайди, ўсимлик танаси кесилганда томирлари қорайиб кетаётганини кўриш мумкин. Касаллик туганакларнинг чиришига сабаб бўлади ва хосилнинг кўп қисми нобуд бўлади. Бу касалликнинг олдини олиш учун уруғлик картошка яхшилаб кўриб чиқилади ва барча касал хамда шубхали картошкалар йўқотилади. Уруғлик картошкани бўлакчаларга кесаётганда касаллик тарқалиб кетмаслиги учун пичоқ 3% ли Лизол эритмаси билан дезинфекция қилинади.
Қора оёқча касаллиги хам бактериал касаллик бўлиб, у картошка ривожланишининг барча фазаларида унга таъсир қилади. Энг аввало картошка ўсимлиги танасининг пастки қисми касалланади ва касаллик ривожланиб кетганда ўсимлик таналари қорайиб, чириб кетади. Касал ўсимликлар ўсишдан тўхтайдилар, барглари сарғаяди, ўралиб кетади ва қурийди. Касаллик жуда ҳам авж олиб кетганда картошка туганаклари ҳам зарарланадилар, уларда бактериал йиринг тўплана бошлайди. Бу касаллик хавфи ёмғирли йилларда ва паст жойлашган ер майдонларида жуда ҳам катта бўлади. Бу касаллик билан оғриган картошкаларнинг хосили йиғиб
олинаётганда ўсимлик поялари йиғилиб, ёқиб юборилади, туганаклар яхшилаб қуритилади ва касаллари улоқтириб ташланади.
Оддий парша касаллиги – чириётган картошка қолдиқларда ва сомонда ривожланади хамда у тупроқни ва ўсаётган туганакларни зарарлайди. Касаллик қуруқ, ғадир-будур яра-чақалар кўринишида пайдо бўлади ва у ривожланганда туганакни бутунлай қоплаб олади. Натижада бундай картошка сақланаётганда чириб кетади. Касалликнинг ривожланишига картошка экишдан олдин ерга янги гўнг солиш сабаб бўлади. Шунинг учун картошка экиладиган майдонга чириган гўнгни кузда солиш мақсадга мувофиқ бўлади. Касалланган майдонни даволаш учун картошка экишга мўлжалланган ер иккига бўлинади – бирига картошка ва бошқасига люпин экилади хамда галма-галдан иккала ўсимлик экилаверади. Паршанинг ривожланишини тўхтатиш учун картошка экилаётганда чуқурчаларнинг хар бирига тупроқ билан яхшилаб аралаштирилган холда 2 граммдан сульфатли марганец солинади.