Касалликлари ва зараркунандаларига қарши

Тамаки трипси

Бу сўрувчи зараркунандалар турига мансуб бўлиб, пиёз, бодринг, тарвуз, қалампир, карам, узум ва бошқа ўсимликларни зарарлайди. У узунлиги 0,8- 0,9 мм ли, ингичка қанотли, мўйлабли майда хашорат бўлиб, личинкалари қанотсиз, бошланғич даврда оч-сариқ, кейинчалик яшил-сариқ рангда бўлади. Личинкалар ўсимлик қолдиқлари ва тупроқнинг юқори қатламларида қишлаб қолади. Ривожланиш цикли 20-25 кун бўлиб, бир йилда 6-8 марта авлод қолдиради.
Тамаки трипсига қарши кураш чоралари қуйидагилар: Алмашлаб экиш, бегона ўтларга қарши курашиш, теримдан кейинги ўсимлик қолдиқларини олиб ташлаш ва йўқотиш, ерни чуқур хайдаш. Кимёвий воситалар сифатида БИ-58, Больдок, Арриво, Карбофос, Циткор, Циперметринни келтириш мумкин. Дозалари бу кимёвий воситаларнинг инструкцияларига биноан аниқланилади.

Ўргимчаккана

Бу маккор хашорат салкам 200 хил ўсимликни зарарлайди. Айниқса бодринг ва полиз экинларининг ашаддий кушандаси бўлиб хисобланади. Модасининг ранги яшил-сариқ бўлиб, кузга келиб эса пушти рангга киради. Узунлиги 0,4-0,5 мм бўлиб, хазонлар остида қишлайди. Баҳорда қишлаб чиққан модалар тухум қўяди ва мавсум давомида 24 тагача авлод қолдиради. Ўсимлик баргларида оч нуқталар вужудга келади, натижада барглар сарғайиб, қуриб тўкилади. Хосил эса кескин равишда камаяди. Бу зараркунанда хосилни 60-70% га камайтиради. Унга қарши кимёвий усулда курашиш учун Амал препарати 2-3 литр/гектар миқдорида салқин вақтда пуркалади. Ўргимчаккана ўсимлик баргининг орқа томонига жойлашиб олиб, баргни сўради. У бир йилда 16 мартагача тухум қўйиш йўли билан кўпаяди.
Ўргимчакканага қарши кураш чоралари қуйидагилар: Туюлган Олтингугурт билан чанглатиш, Коллоидли олтингугурт пуркаш, Тиовин, Кумулус, БИ-58, Каратэ, Карбофос, Амал, Фуфанон ёки Фитоверм препаратлари билан ишлов бериш.