Kafedra mudiri: I. Qur’onov

Erkaklarga kateter kiritish

Erkaklarga kateter kiritish birmuncha qiyin, chunki ularda siydik kanalining uzunligi 22—25 sm bo‘ladi va ikkita fiziologik torayish hosil qilib, ular kateterning o‘tishiga to‘sqinlik qiladi. Muolaja tibbiy qo‘lqoplarda bajariladi. Bemor kateterlash vaqtida oyoqlarini tizzasidan biroz bukib, chalqancha yotqiziladi, oyoqlari orasiga «utka», lotok yoki krujka qo‘yilib, siydik kateterdan shu idishga oqib tushadi. Hamshira yoki vrach chap qo‘liga jinsiy olatni olib uning boshchasini zararsizlovchi eritmaga ho‘llangan paxta bo‘lakchasi bilan yaxshilab artadi. O‘ng qo‘li bilan steril vazelin moyi surtilgan kateterni asta-sekin, ko‘p kuch sarflamay siydik chiqarish kanaliga kiritadi. Kateter pinset yoki steril doka salfetka bilan olinadi. Kateterlashni rezina kateterdan boshlash kerak. U yumshoq va ayni vaqtda qayishqoq bo‘lganligidan osongina turli shaklni egallaydi, bu mavjud to‘siqlarni chetlab o‘tishga imkon beradi. Kateter qovuqqa tushishi bilan siydik paydo bo‘ladi. Erkaklarga metall kateterni faqat vrach kiritadi. Qovuqni yuvish. Qovuq yiring, to‘qimalarning parchalanish mahsulotlarini mexanik chiqarish uchun, shuningdek, sistoskop kiritish oldidan yuviladi. Odatda qovuq rezina kateter yordamida yuviladi. Oldin qovuqning sig‘imi aniqlab olinadi, buning uchun bir marta siydik ajratishda chiqqan siydik miqdori o‘lchanadi. Bemor tizzalarini bukib, sonlarini kerib va chanog‘ini ko‘targan holda chalqancha yotqiziladi. Bu muolajani urologik kursida bajarish mumkin. Rezina naychasiga kateter kiygizilgan Esmarx krujkasida va Jane shprisi bilan qovuqni yuviladi. Bunda kaliy permanganat (1:100000), furasillin eritmasidan foydalanish mumkin. Asboblar steril bo‘lishi kerak. Qo‘lqoplar kiyiladi. Qovuqqa kateter kiritiladi va siydikni chiqarib, uni Esmarx krujkasining rezina naychasi bilan ulanadi. Qovuqni tiniq suyuqlik paydo bo‘lguncha yuviladi va shundan so‘ng sistoskop kiritilmaydigan bo‘lsa, qovuqning yarmigacha eritma bilan to‘ldiriladi va kateter chiqariladi. Yuvishdan keyin bemor 30—60 minut yotishi zarur. Agar qovuq dori moddalari bilan yuviladigan bo‘lsa, bu ishni har kuni yoki kunora bajariladi.
Odatda jami 12—14 marta yuviladi.