Kadrlar tayyorlanadigan

Oilaning ichki hajmini kengaytirish

Ari oilalari bahorda kunlar isishi bilan ona ari kundan-kunga tuxum qo'yishni oshirib boradi va usti berkitilgan lichinkali romlar soni ko'payib boradi. Lichinkalar yetilib, sekin-asta inchalardan chiqib uyada yosh arilar soni ko'paya borib, uyaning bahorgi taftish vaqtida kengaytirilgan holati torlik qilib qoladi va nihoyat oilaga mumkatak inchali romlar qo'shishga to'g'ri keladi.

Oilaning ichki hajmini bahorning birinchi kunlaridan boshlab 20 kuncha o'tgandan keyin kengaytirish ishlarini bajarsa bo'ladi.

Oilaning ichki hajmini kengaytirishni bilish uchun u yoki bu oilani oxirgi mumkatak romi ko'tarib ko'rilganda, uning ichki tarafini arilar to'liq qoplab o'tirgan bo'lsa, oilaning ichki hajmini kengaytirish vaqti kelganidan dalolatberadi.

Oilaning ichki hajmini kuzgi va bahorgi qisqartirish vaqtida ko'p sonli mumkatak inchali romlar to'planib qoladi. Bu to'plan- gan mumkatak romlarning ichidan sifatli yaxshi tortilganlarini ajratib olib alohida yashik va xonalarda kelajakda foydalanish uchun saqlab qo'yiladi; yomon, sifatsizlari esa eritishga tashlanadi.

Saqlashga ajratib olingan mumkatak inchali romlarning yuqori qismida biroz asal bo'lsa, bir yo'la oziq bilan ham ta'minlanadi. Tabiatdan sharbat kela boshlashi bilan uyaning ichki hajmini kengaytirish vaqtida mumparda yopishtirilgan romlar beriladi. Kuchli ari oilalariga bir yo'la 3-4 ta mumkatak inchali rom berish mumkin. Bundan keyin oilaning rivojlanishiga qarab kengaytirish ishlari davom ettiriladi. Ob-havo isib ketishi bilan, o'sha kengay­tirish uchun beriladigan mumkatak romlarni to'g'ridan to'g'ri xuddi ona ari tuxum qo'yayotgan joyga, ya'ni oilaning o'rta qismiga qo'yish mumkin. Bunda inchalami tozalash va ona arining tuxum qo'yishi tezlashadi. Oilaning ichki hajmini kengaytirish uyaning ichi mumkatak romlar bilan to'lgunicha davom ettiriladi.

Yotoq uyada esa butun mavsum davomida uyaning ichki hajmini kengaytirish uchun joy yetarli bo'ladi va tabiatdan keltirilgan sharbatni joylashtirish mumkin.