|
Demokratiyalıq reformalardı tereńlestiriw hám mámleketti modernizaciyalaw.
Mámleketimizde demokratiyalastırıw processleriniń nátiyjeliligin hám sapasın túp-tiykarınan jaqsılaw, puqaralardıń erkinlikleri, huqıqları, múnásip turmıs tárizi hám máplerin támiyinlew, bunda mámleketlik mákemelerdiń juwapkershiligin kúsheytiw, xalıq penen ashıq pikirlesiwdi jolǵa qoyıwda jańa nátiyjeli qurallar hám usıllardı engiziw, «Insan mápleri – hámme nárseden ústin» súreni astında jumıs alıp barıw esaplanadı. Prezident Sh.Mirziyoev mámleketlik hám basqarıw uyımları, huqıqtı qorǵawshı shólkemler wákilleriniń jumıslarına qarata atap ótkenindey: «Biz keyingi payıtta adamlar menen pikirlesiwdi umıtıp qoydıq. Olardıń ishine kirip, ashıq hám shın kewilden sóylesiw, dártin esitiw biziń jumıslarımızda, tilekke qarsı, keyingi orınǵa túsip qaldı»6. Xalıq qabıllawxanalarınıń barlıq aymaqlarda jumıs baslaǵanı, xalıq penen keń kólemde pikirlesiwler júrgizilip atırǵanı mámleketlik hákimiyat hám basqarıw uyımları jumıslarınıń ashıq-aydınlıǵın támiyinlew boyınsha alıp barılıp atırǵan jumıslardı jańa basqıshqa alıp shıqtı.
Mámleket rawajlanıwınıń zamanagóy basqıshında keń kólemli reformalardıń tabıslı ámelge asırılıwı mámleketlik basqarıwdıń pútkilley jańa hám nátiyjeli jumıs alıp barıwshı sistemasın jaratıwdı talap etedi.
Usı múnásibet penen elimizde mámleketlik basqarıw sistemasın túp-tiykarınan jetilistiriw hám modernizaciyalaw boyınsha salmaqlı isler ámelge asırılmaqta.
Mámleketlik uyımlar jumısınıń ashıqlıǵın támiyinlew hám mámleketlik xızmetlerdi kórsetiw sistemasın jetilistiriw ushın elektron portallar hám maǵlıwmatlar bazaları jaratıldı.
Atap aytqanda, ruxsat beriwshi hújjetler hám licenziya alıwdı ápiwayılastırıw ushın www.license.govuz, «bir ayna» principi boyınsha mámleketlik xızmetler kórsetiwdi támiyinlew ushın birdarcha.uz veb-saytları jaratıldı. Mámleketlik xızmetlerdi qayta kórip shıǵıw hám optimallastırıw nátiyjesinde isbilermenlik sub`ektlerin dizimge alıwdıń tártip-qaǵıydaları 4 mártege, dizimge alıw ushın zárúr waqıt bolsa 30 minutqa shekem qısqartıldı.
Sonıń menen birge, sońǵı jılda ámelge asırılǵan keń kólemli jumıslardıń ob`ektiv talqısı, mámleketlik basqarıw uyımlarınıń jumısı, xalıq penen ashıq hám tuwrıdan-tuwrı pikirlesiw nátiyjeleri ushırasqan mashqala hám kemshiliklerdi sistemalı sheshiwge zárúrlik júzege kelgenligin kórsetti.
Bul, birinshi gezekte, tómendegi jaǵdaylarǵa tiyisli:
- bir qatar mákemelerdiń wazıypaları deklarativ qásiyetke iyeligi hám olardı ámelge asırıwdıń shólkemlestiriwshilik-huqıqıy mexanizmleriniń jeterli emesligi;
- tek jaǵdaylardı dizimge alıw hám statistikanı toplawdan ibarat bolıp qalǵan iskerlikti bahalawdıń nátiyjesiz sisteması hám bul kópshilik jaǵdaylarda orınlardaǵı jumıslardıń haqıyqıy jaǵdayın sáwlelendirmeydi;
- aymaqlardı rawajlandırıw baǵdarlamaların qáliplestiriw hám xalıqtıń eń áhmiyetli mashqalaların sheshiwde jergilikli hákimiyat uyımları roliniń páseyiwine alıp keletuǵın mámleket funkciyalarınıń hádden tısqarı oraylastırılǵanlıǵı;
- byurokratlastırıw hám joqarı shıǵınlarǵa alıp kelip atırǵan innovaciyalıq rawajlanıwdıń tómen dárejesi;
- xojalıq basqarıw uyımları tárepinen mámlekettiń tártipke salıw hám xojalıq funkciyalarınıń qosıp alıp barılıwı, salamat báseki ortalıǵınıń rawajlanıwına tosqınlıq etiwshi jeńillik hám preferenciyalardı tańlap usınıw ámeliyatı;
- aymaqlardıń rawajlanıwına unamsız tásir kórsetip atırǵan ayırım basshılarda lazım dárejede juwapkershilik hám baslamashılıqtıń joqlıǵı.
Bul kemshilikler ekonomika tarmaqları hám sociallıq tarawdı modernizaciyalaw, aymaqlardı hár tárepleme rawajlandırıw, xalıqtıń turmıs dárejesi hám abadanlıǵın arttırıw boyınsha mámleketlik siyasattı tabıslı ámelge asırıwǵa tosqınlıq etpekte.
Bul baǵdarda mámleket basshısı tárepinen qabıl etilgen «Ózbekstan Respublikasında Hákimshilik reformalar koncepciyasın tastıyıqlaw haqqında»ǵı Párman 2017-2021-jıllarda Ózbekstan Respublikasın rawajlandırıwdıń bes tiykarǵı baǵdarı boyınsha Háreketler strategiyasın ámelge asırıwda áhmiyetli qádem esaplanadı hám de mazmunına kóre Ózbekstannıń mámleketlik hám jámiyetlik qurılısında jańa betti ashıp beredi.
Ǵárezsizlik sebepli biz ózligimizdi ańladıq, azat xalıq, biyǵárez mámleket sıpatında Ózbekstannıń úlken potencialın pútkil dún`yaǵa kórsetiw imkanı tuwıldı. Qısqa dáwir ishinde mámleketlik hám jámiyetlik qurılısta, siyasiy-huqıqıy, sociallıq-ekonomikalıq tarawlarda úlken tabıslar qolǵa kirgizildi, puqaralarımızdıń sanasında shın mánisinde jańasha kózqaras hám jańasha pikirlew tiykarları qáliplesti.
Ózbekstan Respublikasınıń birinshi Prezidenti I.A.Karimov tárepinen islep shıǵılǵan rawajlanıwdıń «Ózbek modeli» negizinde elimizde sociallıq baǵdarlanǵan bazar ekonomikasına tiykarlanǵan huqıqıy demokratiyalıq mámleket hám puqaralıq jámiyetin qurıw maqsetinde keń kólemli reformalar ámelge asırıldı. Ótken dáwir ishinde Ózbekstanda mámleketlik hákimiyat hám basqarıwdı demokratiyalastırıw tarawında ámelge asırılǵan reformalar júdá áhmiyetli bir maqsetke, yaǵnıy, hákimiyatlar bóliniwiniń konstituciyalıq principin turmısqa engiziw, olardıń ortasında ózin tıyıp turıw hám mápler teńsalmaqlılıǵınıń nátiyjeli sistemasın qáliplestiriw, orayda hám orınlarda nızam shıǵarıwshı, jergilikli mámleketlik wákillik uyımlarınıń wákillikleri hám de qadaǵalaw wazıypalarınıń rolin kúsheytiw, sud-huqıq sistemasın liberallastırıw hám biyǵárezligin támiyinlew, jámiyet hám mámleket turmısınıń barlıq tarawlarında demokratiyalıq ózgerislerdi ámelge asırıwda mámleketlik emes kommerciyalıq emes shólkemler hám puqaralıq jámiyetiniń basqa da institutlarınıń roli hám áhmiyetin, sociallıq belsendiligin arttırıwǵa qaratılǵan zárúr is-ilajlardı ámelge asırıwǵa qaratıldı.
Do'stlaringiz bilan baham: |
