Жиззах политехника институти «электроэнергетика» кафедраси

ЎЗБЕКИСТОН РЕСПУБЛИКАСИ ОЛИЙ ВА
ЎРТА МАХСУС ТАЪЛИМ ВАЗИРЛИГИ
ЖИЗЗАХ ПОЛИТЕХНИКА ИНСТИТУТИ
«ЭЛЕКТРОЭНЕРГЕТИКА» кафедраси


Автоматик бошқариш назарияси
Курс ишини бажариш бўйича
услубий қўлланма.



Жиззах – 2016

Автоматик бошқариш назарияси асослари фани бўйича курс ишини бажариш учун қўлланма/ Жиззах Политехника Институти.

Тузувчилар: Жиззах политехника институти доценти А.Г.Порсахонов, политехника институти ўқитувчиси Ж.А. Мустофоқулов.

Мазкур қўлланма олий техник ўқув юртларининг автоматик бошқариш назарияси, автоматика асослари ва ишлаб чиқариш жараёнларини автоматлаштириш курсларини ўрганувчи талабалар учун мўлжалланган бўлиб, курс иши топшириқлари вариантларини, курс ишини бажариш учун кўрсатмалар ва курс ишини бажаришга мисолни ўз ичига олган.

Қўлланмани чоп этиш учун Жиззах Политехника институти илмий – услубий кенгашиининг «____ » __________ 2016 йил қарори билан рухсат олинган
Муҳаррир: Бахти Рашидова
Техник муҳаррир: Мустофоқулов Ж

Тақризчи: Жиззах Давлат педагогика институти доценти

Н.Г.Гаппаров.

УМУМИЙ КЎРСАТМАЛАР

Курс ишининг асосий мақсади – фаннинг назарий қисмида олинган билимларни мустаҳкамлаш ҳамда берилган автоматик бошқариш системаси (АБС) нинг элементларини, уларнинг дифференциал тенгламаларини, узатиш функцияларини аниқлаш, берилган элементлар ёрдамида АБС ни тузиш, системанинг умумий узатиш функциясини ва турғунлигини аниқлаш усулларини ўзлаштиришдан иборат. Курс ишини бажариш давомида талабалар берилган мавзуни ёритиб бериши, вариант бўйича берилган АБС нинг функционал схемасини шартли белгилар ва тегишли қоидалар асосида чизиши, элементларнинг тенгламалари асосида системанинг умумий узатиш функциясини топишни, система турғунлигини Гурвиц ва Михайлов критерийлари ёрдамида текширишлари зарур.

Курс иши топшириғи 3 та вазифадан иборат.
Биринчи вазифада ҳар бир талабага технологик параметрларни ўлчаш ёки автоматик бошқариш назарияси бўйича конкрет мавзу берилиб, талаба бу мавзуни тўлақонли ёритиб бериши керак.
Иккинчи вазифада берилган АБС нинг принципиал ва структура схемасида фойдаланиб унинг функционал схемасини тузиши, элементларнинг дифференциал тенгламалари асосида ёпиқ (берк) системанинг умумий узатиш функциясини аниқлаш керак бўлади.
Учинчи вазифада эса олдинги вазифада топилган ёпиқ системанинг умумий узатиш функциясидан фойдаланиб АБС элементларнинг берилган параметрларида турғун ёки нотурғун эканлигини Гурвиц ва Михайлов критерийлари ёрдамида аниқланади.
КУРС ИШИ БЎЙИЧА ВАЗИФАЛАР.