Jeńis Lepesov (Xudojnik)

Jeńis Lepesov (Xudojnik)
Lepesov Jeńis 1945-jılı Shımbay rayonında tuwılǵan. 1966-70-jıllarda Alma-Ata kórkem-óner bilim jurtında tálim alǵan. Kórkem-óner bilim jurtında ustazları T. Toǵızbaev, M. Ismailov, grafik V. Krushin, B. Pak, S. Aytbaevlar bolǵan. Nókisge kelgennen keyin xudojnikler ustaxanasında I.V. Savickiy, Q. Saipov, Q. Berdimuratov, J. Quttımuratov, R. Matevosyan, J. Bekanovlar menen tanısqan hám birgelikte islegen. 1978-jıldan baslap jergilikli, Respublika hám sırt ellerde ótkerilgen kórgizbelerdiń turaqlı qatnasıwshısı bolǵan. Xudojnik óziniń jumısları menen Tashkent, Alma-Ata, Ufa, Moskva, Maxachqala qalalarında bolıp ótken kórgizbelerge qatnasqan. Xudojnik jivopis,natyumort, portret, peyjaz, grafika janrlarında kóplegen kartinalar jaratqan. Jeńis Lepesov tek ǵana xudojnik emes, tájiriybeli ustaz. Ol 30 jıldan aslam E. Qospolatov atındaǵı Nókis balalar kórkem-óner mektebinde dóretiwshilik jumısları menen ustazlıq jumısların biriktirip alıp barǵan. Pedagogika tarawında islegen ayrıqsha miynetleri ushın 1996-jılı “Ózbekstan Respublikasına miyneti sińgen jaslar ustazı” ataǵı menen sıylıqlanǵan. Ózbekstan Kórkem-óner Akademiyasınıń dóretiwshiler shólkemi aǵzası, kóp jıllar dawamında islegen miynetleri ushın 2008-jılı Ózbekstan Kórkem-óner Akademiyasınıń “Altın medalı” menen sıylıqıanǵan. 2012-jılı dóretiwshilik hám pedagogikalıq jetiskenlikleri menen “Jıldıń eń jaqsı ustazı” nominaciyasi jeńimpazı, 2018-jılı “Qaraqalpaqstan xalıq xudojnigi” ataǵın alıwǵa eristi.
Házirgi kúnde Qaraqalpaqstan Respublikası I.V. Savickiy atındaǵı mámleketlik kórkem-óner muzeyinde xudojniktiń 57 dana jumısı saqlanbaqta.

J. Lepesov; “Qosıq”; kenep, mayboyaw; 107x92 sm

J. Lepesov; “Muzikantlar”; kenep, tempera; 55x81 sm


J. Lepesov; “Avtoportret”; karton, mayboyaw; 61x39 sm