Jabbor оmоnturdiyеv аnvar оmоnturdiyеv

UNDOV BELGISI VA UNING QO’LLANISH O’RINLARI

1. Emotsionallik ifodalaydigan, kuchli ko’tariluvchi, to’lqinli ohang bilan aytiladigan gaplar oxiriga undov belgisi qo’yiladi: Qanday qilay, sevinch sayratsa tilni! Bahor tuyg’ulari yayratsa dilni! (U.) Bahor qanday maftunkor fasl!!! (U.)

2. Vokativ gaplar oxiriga undov belgisi qo’yiladi: Qalandarov gulzorning narigi tomonidagi idoraga qarab: Eshon, hoy! – deb qich-qirdi. (A.Q.)

3. Emotsiya ifodalaganda, quyidagi so’z-gaplar oxiriga undov belgisi qo’yiladi:

a) undov so’zlar: Uf! Qush edim, qanotimni qayirdilar... (H.H.) Attang! Attang! Biz g’aflatda qolgan ekanmiz-da! (S.Ahm.);

b) rasm-odat undovlari: Teshaboy: Xormanglar, ho! Ovozlar: Bor bo’linglar! Bor bo’ling! Teshaboy: Balli! Rahmat! (U.)

v) kirish so’zlar: Hammangiz ham bir varakay to’y qilasiz! Tursun: Albatta! (U.) Chopiqda ham g’ayrat qildi. Ovozlar: To’g’ri! To’g’ri! (U.)

g) ha, xo’p, yo’q so’zlari: Xo’p! Xo’p dedik-ku! (K.Y.) Xo’-o’sh! Yana nima kerak! (A.Q.) Yo’q! Uning alamli qalbiga bular orom bera olmagan. (U.)

4. Emotsiya ifodalasa, nominativ gaplar oxiriga undov belgisi qo’yiladi: Hayot!.. Sen bo’lmasang, yashash yo’q bir on! Jamol: Sho’rim qursin! Sarvi: Dahshat! Shoista: Falokat! (U.) Saida... qop qora va yopishqoq bir narsaga toyrilib yiqildi. Qon!... Saida uyog’ini bilmaydi (A.Q.)

5. Infinitiv gaplar oxiriga undov belgisi qo’yiladi: Ona mehridan judo bo’lish! Buning alam-hasratini aytib ado qilolmaysan. (T.T.)

6. Kuchli intonatsiya bilan aytiladigan undalmalar oxiriga undov belgisi qo’yiladi: Quyidagi ikki holatni qiyoslang: Toxirjon aka! – dedi entikib Saida. Kechiring, Tohirjon aka, og’zimdan chiqib ketdi. (A.Q.) Zamonamiz dadil qadamlar zamonasi-ku, qizim! (A.Q.)

7. Ritorik so’roq gaplar undov ohangi bilan aytilganda undov belgisi qo’llaniladi: Nima bizga Amerika! Nima bizga uning sur'ati! (H.O.)

8. Emotsional buyruq gaplar oxiriga undov belgisi qo’yiladi: Bunaqa savollar majlisda berilsin! Raisning o’zi borida gapirilsin! (A.Q.) Marhamat, kiring! – dedi Nosirov. (A.Q.)

9. Darak gaplar ham his-hayajon bilan aytilsa, oxirida undov belgisi qo’llaniladi: Ha, o’q tamom bo’libdi! – deb o’yladi o’zicha (H.Sh.) Men kolxozni opichlab katta qilganman!... (A.Q.)