Islom Karimov: Bugun O‘zbekiston o‘zining ixcham, tezkor va harakatchan, yetarli darajada qurollangan milliy armiyasiga ega”

Vatan himoyachilari kim? Vatan himoyachilari - asl farzandlarimiz! Aslida barchamiz Vatan himoyachilarimiz. Lekin bugun egniga harbiy libos kiyib, postda turganlar - amaldagi vatanparvarlardir. Ular kechani-kecha demay, kunduzni-kunduz demay, yurtimiz sarhadlarini yovuz niyatli kimsalardan asraydilar. Bu azamat o'g'lonlarimiz tinch-farovon kunlarimiz mas`uliyati bilan uyg'oq. Shu bois, biz - dovrug'li sarkardalar va pahlavonlar vorislari ona yurtimizda Vatan himoyachilari kunini katta tantana bilan nishonlaymiz!

14-yanvar - Vatan himoyachilari kuni


14-yanvar - Vatan himoyachilari kuni


ORIYATLI ASKARLAR


O`zbekiston chaman diyor,
Yashnar bog`u bo`stonlari.
Oq oltini mo`l-ko`l,bisyor,
Xazinaga boy konlari.
Qo`riqlaydi o`g`lonlari,
Ona Vatan posbonlari.
O`tkir ko`zli lochinlari,
Hushyor asrar sarhadlarin.
Uyda kutar Barchinlari,
Alpomishu Farhodlarin.
Qaddi baland osmonlari,
Ona Vatan posbonlari.
O`zbegimning nomus, ori
Oriyatli askarlari.
Momolarim iftixori
Burgut misol shunqorlari.
Toza vijdon, iymonlari
Ona Vatan posbonlari.
Qadamidan o`t chaqnaydi,
Tomirida Temur qoni.
Shunqorli el hech qo`rqmaydi,
Ortar olqish, sharaf-shoni.
Dev kelbatli polvonlari,
Ona Vatan posbonlari.
Vatanimiz O`zbekiston
Ushalmoqda armonlari.
Madhiyasi tilda doston,
Dardiga em-darmonlari,
Yurtiga jon qurbonlari,
Ona Vatan posbonlari.


Ravshan ISOQOV
BAXT QUSHLARI PARVOZ QILSIN YURT OSMONIDA
14-yanvar — Vatan himoyachilari kuni

Mustaqillik yillarida mamlakatimizda umumxalq bayrami sifatida nishonlanib kelayotgan Vatan himoyachilari kuni yaqinlashib kelmoqda. Bu kun to‘la ma’noda barchamiz uchun qadrli va ahamiyatli bo‘lib qoldi. Zero, sarhadlarimiz dahlsizligini, mamlakatimiz va butun mintaqada tinchlik-totuvlikni ta’minlay oladigan, yovuz kuchlarning g‘arazli niyat va xurujlarini bartaraf etishga qodir armiya mavjud ekan, hayotimiz hamisha osuda, osmonimiz musaffo bo‘ladi.

Mustaqillik yillarida davlatimiz rahbarining tashabbusi, xalqimizning xoxish-irodasi bilan shakllangan milliy armiya yoshlarimiz uchun jismoniy va ma’naviy chiniqish, shaxs sifatida kamol topish, zamonaviy harbiy va texnik mutaxassisliklarni egallash, hayotda bo‘ladigan turli murakkabliklarni matonat bilan yengish borasida o‘ziga xos maktabga aylanib qoldi. Shu jihatdan qaraganda, bugun mamlakatimiz Qurolli kuchlari safida xizmat qilish – faxrli yigitlik orzusidir.

Harbiy xizmatchilarimizning ona-Vatan, xalq oldidagi muqaddas burchi to‘g‘risida Prezidentimiz shunday degan edi: “Bugun barchamiz qanday murakkab zamonda yashayotganimizni yaxshi tushunamiz. Xalqaro terrorchilik, ekstremizm, ko‘lami tobora kengayib borayotgan narkoagressiya kabi balo-qazolar mamlakatimizning hozirgi kuni va kelajagi uchun jiddiy tahdidga aylanmoqda... Bunday vaziyatda barchamiz doimo hushyor va sergak bo‘lish, yangi kuch va imkoniyatlarimizni safarbar etgan holda, Qurolli kuchlarimizning mudofaa qobiliyatini mustahkamlash naqadar muhim ahamiyatga ega ekanini yanada chuqurroq anglaymiz, albatta”.

14-yanvar — Vatan himoyachilari kuni

Ona-yurt himoyasi, tug‘ilib o‘sgan Vatan osmonining beg‘uborligi hamma zamonlarda ham inson farog‘ati, bu yorug‘ dunyoda xotirjam umrguzaronlik qilish, ezgu niyatlarni ro‘yobga chiqarish, farzandlar tarbiyalashning muhim sharti bo‘lib kelgan. Shunday ekan, barchamiz uchun birday aziz bo‘lgan shu ona-Vatan hamisha bor bo‘lsin, osmonida baxt qushlari emin-erkin parvoz qilsin!

Bayramingiz muborak, aziz Vatandoshlar!