Ишмурадов шухрат улуғбердиевич

Тадқиқот натижаларининг илмий ва амалий аҳамияти. Дискли плуг иш кўрсаткичларининг иш органлари, ҳаракат йўналиши ва тикка нисбатан ўрнатилиш бурчаклари, улар орасидаги кўндаланг ва бўйлама масофалар ҳамда агрегат ҳаракат тезлигига боғлиқ равишда ўзгариш қонуниятлари тадқиқотларнинг илмий аҳамиятини белгилайди. Параметрлари асосланган дискли плугни шудгорлашда қўллаш ағдаргичли плугларга нисбатан меҳнат сарфини 32,44 фоизга, ёнилғи мойлаш материаллари сарфини ҳар бир гектар ҳисобига 3,32-3,61 кг га ва эксплуатацион харажатларни 23,85 фоизга камайтириши натижаларнинг амалий аҳамиятини ифодалайди.
Тадқиқот натижаларининг жорий қилиниши. Тадқиқот натижалари дискли плугнинг саноат намунасини ишлаб чиқиш учун “БМКБ-Агромаш” ОАЖга топширилган. Ишлаб чиқилган дискли плугнинг тажриба нусхалари 2009-2011 йилларда Янгийўл туманидаги фермер хўжаликлари ва институт тажриба хўжалиги далаларида хўжалик синовларидан ўтган.
Ишнинг синовдан ўтиши. Диссертация ишининг асосий мазмуни бўйича 2009-2011 йилларда “Фермер хўжаликлари учун агроинженерлик хизматларини ривожлантириш истиқболлари” (Самарқанд, 2008 й.), “Қишлоқ хўжалик маҳсулотларини етиштириш, сақлаш ва қайта ишлашнинг экологик соф ресурстежамкор технологиялари” (Тошкент, 2009 й.), “Қишлоқ хўжалигида техника ва технологиялар сервисини ривожлантириш истиқболлари” (Қарши, 2010 й.) “Инновацион ғоялар, технологиялар ва лойиҳаларни ишлаб чиқаришга тадбиқ этиш муаммолари” (Жиззах, 2010 ва 2012 й.), “Қишлоқ хўжалигини ривожлантиришнинг бозор иқтисодиёти шароитидаги долзарб муаммолари ва уларнинг самарали ечимлари” (Фарғона, 2011 й.), “Инновацион лойиҳаларни ишлаб чиқаришга тадбиқ этиш муаммолари” (Жиззах, 2011й.), “Педагогик жараёнларни ташкил этиш ва бошқаришда замонавий ёндашувлар” (Наманган, 2011й.), “Ер ресурсларидан самарали фойдаланиш ва уларни муҳофаза қилишнинг далзарб муаммолари” (Тошкент, 2011 й.) “Қишлоқ хўжалигида хусусий тадбиркорликни ривожлантириш истиқболлари” (Андижон, 2011й.) илмий-амалий анжуманларида маъруза қилинган. Иш тўлиқ ҳажмда ЎзМЭИ илмий-техник кенгаши ва ТИМИ илмий семинари йиғилишларида муҳокамадан ўтган ва маъқулланган.