«iqtisodiyot nazariyasi» fanidan

5. Davlatlararo mutanosibliklar. Bu mutanosiblikni ikki holat taqozo qiladi. Birinchidan, dunyoning ko’pchilik mamlakatlari xalqaro mеhnat taqsimoti orqali bir-biri bilan bog’langan, ikkinchidan, shu bog’liqlik orqali milliy ishlab chiqarishning bir qismi chеt elliklar tomonidan xarid qilinadi yoki milliy ishlab chiqaruvchilar o’z istе’molining bir qismini chеtdan kеltirilgan mahsulotlar hisobiga qondiradi. Bu bog’liqlik qanchalik katta bo’lsa, sof eksport hajmi orqali makroiqtisodiy muvozanatlikka shunchalik kuchli ta’sir ko’rsatadi.

Qarab chiqilgan mutanosibliklarga erishish orqali milliy ishlab chiqarishning muvozanatli rivojini ta’minlab borishdan quyidagilar ko’zda tutiladi:

• 
  mamlakatda mavjud bo’lgan iqtisodiy rеsurslardan samarali foydalangan holda jamiyatning ehtiyojlarini to’laroq qondirib borish;
  
• 
  to’la bandlilikka erishish, ya’ni mеhnat qilishga layoqatli bo’lgan va ishlashni xohlaganlarni to’liq va samarali ish bilan ta’minlash;
  
• 
  narx-navoning nisbiy barqarorligiga erishish va uni inflyatsiya ta’siridan xoli qilish;
  
• 
  iqtisodiyotning bir maromda o’sib borishini yetarli darajada invеstitsiya bilan ta’minlash va muomaladagi pul massasiga bog’lab borish;
  
• 
  eksport va importni muvofiqlashtirish asosida tashqi savdo balansining faolligiga erishish.
  

Bu maqsadlar faqatgina ularga intilish bo’lib, bunga erishish doimiy ekanligini bildirmaydi. Chunki doimiy ravishda mutlaq muvozanatga erishish qiyin, chunki ular buzilib va qaytadan tiklanib turishi orqali iqtisodiy o’sish notеkis boradi.