Инновацион таълим технологиялари” кафедраси Касб-ҳунар таълими тизими кадрларининг малакасини ошириш курси

1.3 Ўқув устахонасида ишлаб чиқариш таълими бўйича машғулотлар.
Ўқув устахонасида ишлаб чиқариш таълими — талабалар ўқув ва ишлаб чиқариш фаолияти кўламини кенгайтиришнинг муҳим шартларидан биридир. Ўқув устахоналарида ишлаш ўқув-тарбиявий жараённинг самарадорлигини оширади, чунки ўқитиш шароитлари ишлаб чиқариш шароитларига яқин ва талабаларга мураккаб маҳсулот ишлаб чиқариш жараёнини ўзлаштириш имконини беради.
Таянч ишлаб чиқариш корхоналари устахоналарида машғулотлар.
Талабаларнинг корхонада ишлаб чиқариш таълими олишларидан асосий мақсад — уларнинг касбий кўникма ва маҳоратларини ошириш, касбий билимларни кенгайтириш ва чуқурлаштириш, илғор ишлаб чиқариш тажрибаси билан таништириш, ишлаб чиқариш амалиётига тайёрлаш ва шулар асосида касб-ҳунар коллежларини тугатгандан сўнг ишлаб чиқаришда мустақил фаолият кўрсатишга ўргатишдан иборатдир. Талабаларни корхона устахоналарида ўқитиш — малакаси паст мутахассисларни тайёрлашдаги ҳал қилувчи давр ҳисобланади. Бу ерда талабалар ишлаб чиқариш ҳолати, янги жиҳозлар ва технологик мосламалар, замонавий технологик жараёнлар билан танишадилар.
Корхонада ишлаб чиқариш таълими талабаларнинг мажмуавий ишларни бажаришда муҳим кўникмаларни мустаҳкамлашлари ва такомиллаштиришларига, технологик жараёнларни режалаштириш маҳоратига эга бўлишганда, турли маҳсулотларнинг ассортиментлари билан кенг танишиб чиқишларига йўналтирилган.
Ишлаб чиқариш амалиёти. Ишлаб чиқариш амалиёти касбий тайёргарликнинг якуний босқичини тасвирлайди ва ўқитишнинг сўнгги ойларида ўтказилади. Ишлаб чиқариш амалиёти жараёнида ечиладиган вазифаларга қуйидагилар киради: талабаларнинг ишлаб чиқариш шароитларига ижтимоий, психологик ва физиологик жиҳатдан мослашиши; касбий билим, кўникма ва маҳоратларни такомиллаштириш; танланган касб бўйича ихтисослаштириш; мураккаб ишлаб чиқариш ишларини бажаришда мустақил ишлаш тажрибасини тўплаш; илғор технологиялар ва замонавий жиҳозларни, механизатциялаштириш ва автоматлаштириш воситаларини ўрганиш; юқори унумли асбоб ва мосламаларни, ишлаб чиқаришнинг илғор тажрибасини ўзлаштириш; корхонанинг техник ва технологик ҳужжатларини, иш ўринларида меҳнатни илмий ташкил қилиш масалаларини ўрганиш; кўникма ва маҳоратни шакллантириш; билимларни амалиётда қўллаш; мураккаб ишлаб чиқариш вазифаларини ечишдан иборатдир. Ишлаб чиқариш амалиёти таянч ишлаб чиқариш корхонаси иш ўринларида ташкил этилади. Корхона, одатда, амалиётга раҳбарлик қилиш учун муҳандис-техник ходимлар ва малакали мутахассислар ажратади. Таълим олишнинг бу даврида талабалар корхонада мустақил касбий фаолият кўрсатишга тўлиқ тайёрланадилар.