Инглиз тилида турғун ибораларнинг ўзига хос хусусиятлари

Фойдаланилган адабиётлар рўйхати .................................................... 52
КИРИШ
Ўзбекистоннинг дунёдаги кўплаб давлатлар билан халқаро иқтисодий ва маданий алоқаларининг ривожланиб бораётган бу даврида чет тилларни ўрганишга бўлган эҳтиёж янада кучайди. Ўзбекистон Республикаси Президенти И.А.Каримов таъкидлаганидек, ”жаҳон ҳамжамиятида ўзининг муносиб ўрнини эгаллашга интилаётган давлат учун ҳорижий тилларни мукаммал билишнинг моҳиятини тушуниш мураккаб эмас, зеро бизнинг халқимиз ўз буюк келажагини хорижий ҳамкорлар билан ҳамжиҳатликда кўради” [2;138]. Шу боисдан, педагогика, филология каби фан йўналишларида ҳам дидактика, луғатшунослик, матн назарияси, таржимашуносликнинг янги асосларини ишлаб чиқишни жадаллаштириш каби муҳим вазифалар турибди. Мана шу вазифаларни ҳал қилиш ҳақида сўз юритар экан, И.А.Каримов, “Эндиликда адабиётимизнинг энг етук асарларини бевосита она тилимиздан ғарб ва шарқ тилларига таржима қилишга қаратилган ишларни кучайтиришимиз зарур. Бунинг учун хорижий тилларни, адабиёт ва бадиий таржима санъатининг назарий ва амалий жиҳатларини ҳар томонлама пухта эгаллаган мутахасисларни тайёрлаш имконияти бизда мавжуд” деган фикрларни таъкидлаб ўтади [2;139].
Ўзбекистон Республикаси Президенти И.А.Каримов ижтимоий ривожланишнинг миллий модели ҳақида сўз кетганда, жаҳон маданияти ва илм-фани тараққиётидан бохабар бўлган, бебаҳо миллий маданиятимиз сарчашмалари билан қалблари лиммо-лим тўлган, ўз юртининг ҳақиқий ватанпарварлари бўлган, зиёли ҳамда ғайратли, шижоатли ёшларни тарбиялай билган мамлакатгина ривожланган, гуллаб яшнаган буюк келажакни ярата олиши ҳақида таъкидлаб ўтади [3;154].
Кадрлар тайёрлаш Миллий дастури ҳам худди шу мақсадлар йўлида ишлаб чиқилган. Мазкур дастурда юксак умумий ва профессионал маданиятга эга бўлган, ижтимоий ва ижодий фаол, ижтимоий-сиёсий ҳаётга мустақил мослаша оладиган ва ўз олдига улкан мақсадларни қўя биладиган ҳамда уларни амалга ошира оладиган янги авлод кадрларини етиштириш йўллари ёритиб берилган.[4;61].
Мазкур битирув малакавий иши инглиз тилида фразеологик бирликларнинг ўзига хос хусусиятларини семантик структурал жиҳатдан тадқиқ этишга бағишланган.