Ilmiy seminar ishi

II Bob Olingan natijalarni tahlil qilish

Magniy nitratning atsetamid, karbamid, nitrokarbamid, tiokarbamid va nikotinamid bilan bir turli va aralash ligandli koordinatsion birikmalari taxlili natijalari ko’rib chiqiladi. Sintez qilingan birikmalar rentgen fazaviy, derivatografik usullar va IQ-spektroskopiya yordamida taxlil qilingan. Olingan natijalar asosida sintez qilingan birikmalarning strukturasi taklif qilingan va taklif qilinayotgan strukturalarning kvant-kimyoviy hisobi olib borilgan. Magniy nitratining bir turli va aralash ligandli koordinatsion birikmalarining individualligini aniqlash uchun rentgenfazaviy tahlil natijalari keltirilgan. Olingan birikmalarning individualligi ligandlarning erkin molekulalari va sintez qilingan birikmalarning difraktogrammalarini taqqoslash yo’li bilan isbotlangan. Tekisliklararo masofalar va nisbiy sezgirliklar orasidagi farq sintez qilingan birikmalar individual kristall panjaraga ega ekanligini ko’rsatadi (1-rasm). IQ-spektroskopiya ma’lumotlari asosida ligandlar va olingan kompleks birikmalarning tebranish chastotalari o’rganilgan. Karbamid, formamid, atsetamid, nitrokarbamid ligandlarida koordinatsiyalanish kislorod yoki azot atomlari orqali sodir bo’lishi ma’lum. Agar koordinatsiya azot atomlari orqali sodir bo’lsa, u holda C = O guruhining valent tebranish chastotasi ortishi va C-N bog’i valent tebranishlar chastotasining kamayishi kuzatiladi. Agar koordinatsiya kislorod orqali sodir bo’lsa, u holda C = O guruhining valent tebranish chastotasi kamayish holati kuzatiladi.