«ijtimoiy fanlar va jismoniy madaniyat» kafedrasi

O‘qitishda tizimlilik va izchillik- tizimlilik va izchillik tamoyili o‘qitishni shunday tashkil etishni talab etadiki, bunda o‘quv fanlarini o‘qitish qat’iy mantiqiy tartibda olib boriladi, o’quvchilar bilim ko‘nikma hamda malakalarni izchillik bilan egallab boradilar va ayni zamonda amaliy vazifalarni hal qilish uchun ulardan foydalanishni o‘rganadilar.

Tizimlilik va izchillik jarayoni o‘quv jarayonining hamma zvenolarida amalga oshiriladi. Uning talablari darsliklar va dasturlarni tuzishda o‘z aksini topadi. Ulardagi material bir qator didaktik talablar (fanni o‘rganish maqsadi, uning boshqa hamda fanning mantiqi bilan belgilanadigan tizim bo‘yicha joylashtiriladi. O‘quv dasturida nazariy va amaliy mashg‘ulotlar bir-biriga uzviy bog‘lanishi saqlanishi kerak. Har bir darsda o‘quv maqsadini aniq belgilash va belgilangan maqsadga muvofiq keluvchi mazmunini tarkib toptirish kerak. Har bir kasbiy fani uchun o‘quv dasturi talabiga mos holda dastavval tayanch tushunchalarni aniq belgilab olib, ularning darajasi va me’yorini aniqlash kerak. Maxsus fanlarni o‘qitishda qo‘llaniladigan metodlarni aniq belgilab, yuqori samara beruvchi usuldan foydalanish, mashg‘ulotlar davomida berilayotgan bilim va ko‘nikmalarning o’quvchilar tomonidan o‘zlashtirish darajasini belgilovchi nazorat va tekshirishning turli usullari hamda testlardan foydalanish muhim ahamiyat kasb etadi. O’quvchilarning ma’lumot darajasi oshib borishiga va rivojlanishiga qarab predmetni bayon qilishning didaktik sistemasi fan sistemasiga tobora yaqinlashib boradi. Mashg‘ulotlarni o’tkazishda dasturga aniq rioya qilish va o’quvchiarning darslik bilan ishlashi ularning bilimlarni muayyan tizimda o‘zlashtirib olishga yordam beradi.