Ichki ishlar idoralari xodimlarining

§. ICHKI ISHLAR IDORALARI XODIMLARI KASB AXLOQINING MOHIYATI, TARKIBIY QISMLARI, SOHA VA XUSUSIYATLARI

Ichki ishlar idoralarining xodimlari o‘z huquqlari doirasida fuqarolarning huquqlari va qonuniy manfaatlarini, jamoat tartibini, jamoat xavfsizligini muhofaza qilishni va jinoyatchilikka qarshi kurashni ta’minlash kabi bir qancha vazifalarni bajaradilar, ya’ni huquq himoyachisidek sharafli va nihoyatda mas’uliyatli kasb sohibi sifatida jamiyat ichida faoliyat ko‘rsatadilar. Shubhasiz, har bir kasb, ishlab chiqarish faoliyati kishilarning axloqiy sifatlari va ruhiyatiga o‘z muhrini bosadi va biz uni ichki ishlar idoralari xodimlari kasb axloqining tarkibiy tuzilishida ko‘rishimiz mumkin.
Axloqning tarkibiy qismlari. Ichki ishlar idoralari xodimlarining kasb axloqi murakkab tuzilishga ega bo‘lib, asosan uch tarkibiy qismdan: axloqiy ong, axloqiy amaliyot va axloqiy munosabatlardan tashkil topadi.
Axloqiy ong. Jamiyatda yashovchi har bir insonning mehnat faoliyati, xatti-harakatlari uning ongi orqali boshqariladi. Chunki ong kishilarning obyektiv olamni, ya’ni jamiyatni, tabiatni aks ettiruvchi g‘oyalari, naza- riyalari, his-tuyg‘ulari va odatlarining majmui bo‘lib, siyosiy, huquqiy, axloqiy, falsafiy, diniy, estetik qarashlar va kechinmalar shaklida namoyon bo‘ladi. Binobarin, axloqiy ong ijtimoiy ongning bir shaklidir.
Ichki ishlar idoralari xodimlarining axloqiy ongi xizmat jamoalari- ning manfaatlariga mos keluvchi axloqiy tushuncha, g‘oya, qarash, ishonch, tuyg‘u, hissiyotlarning bir butun tizimidan iborat bo‘lib, kishilar, xususan, ichki ishlar idoralari xodimlarining jamiyatdagi, kundalik turmushdagi axloqiy faoliyati va xulqi u aks ettiradigan obyekt hisob- lanadi.
Axloqiy ongning tuzilishi. Axloqiy ong ikki ajralmas qismdan, ya’ni muayyan bir xodimning ongi bo‘lgan individual ong va bir qancha xodimlar birlashmasi bo‘lgan xizmat jamoalarining ongini o‘zida mujassamlashtirgan ijtimoiy ongdan iborat bo‘ladi. Individual axloqiy ong tarkibiga – shaxsning his-tuyg‘usi, fikr-mulohazalari kabilar, ijtimoiy axloqiy ong tarkibiga esa jamiyat tomonidan ishlab chiqilib, hayotga tatbiq etiladigan kodekslar, kategoriyalar, normalar, prinsiplar, mafkuraviy g‘oyalar va boshqa qonun-qoidalar kiradi.