Ichki ishlar idoralari xodimlarining

2-§. ICHKI ISHLAR IDORALARIDA BOSHLIQLAR VA BO‘YSUNUVCHILAR, KATTALAR VA KICHIKLAR O‘RTASIDAGI AXLOQIY-ESTETIK MUNOSABATLAR
Ichki ishlar idoralari xodimlaridan iborat xizmat jamoasiga rahbarlik qilish yakkaboshchilik prinsipiga asoslanadi.
Ichki ishlar idoralari xodimlarining xizmat jamoalarini boshqarishning yakkaboshchilik prinsipi deb boshliqlarning vujudga kelgan vaziyatni har tomonlama o‘rganish, baholashdan kelib chiqqan holda yolg‘iz o‘zi qaror qabul qilish, qonun va nizomlarning talablariga qat’iy muvofiq ravishda buyruqlar berish va ularning bajarilishini talab qilish, bajarmaganlarga nisbatan tegishli choralar ko‘rish huquqi asosida jamoaga rahbarlik qilish qoidasiga aytiladi.
Har qanday xizmat jamoasi boshliqlar va bo‘ysunuvchilardan tashkil topadi. O‘z xizmat maqomi va maxsus unvoniga ko‘ra ayrim xizmatchilar boshqalarga nisbatan boshliq yoxud bo‘ysunuvchi maqomiga ega bo‘lishi mumkin.
Boshliq bo‘ysunuvchiga buyruqlar berish va ijrosini talab qilish huquqiga ega. Boshliq bo‘ysunuvchi uchun xushmuomalalik va bosiqlik namunasi bo‘lishi va takallufsizlikka ham, noxolislikka ham yo‘l qo‘ymasligi lozim. Boshliq bo‘ysunuvchining insoniy qadr-qimmatini poymol etuvchi harakatlari uchun javobgar bo‘ladi.
Bo‘ysunuvchi boshliqning buyruqlarini so‘zsiz bajarishi shart. Agar u o‘ziga nisbatan noto‘g‘ri munosabatda bo‘lingan deb hisoblasa, buyruqni bajarib, undan keyin shikoyat qilishi mumkin.
O‘z xizmat maqomi va maxsus unvoniga ko‘ra boshqa xizmatchilarga nisbatan ularning boshlig‘i yoxud bo‘ysunuvchisi sanalmagan xizmatchilar katta yoxud kichik bo‘lishlari mumkin.
Kattalik xizmatchilarning maxsus unvoniga qarab belgilanadi. Maxsus unvoni bo‘yicha kichiklar xizmat intizomini, jamoat tartibini, axloq, maxsus kiyim-kechak kiyish va harbiychasiga salomlashish qoidalarini buzgan hollarda, kattalar ulardan bu tartibbuzarlikni bartaraf etishlarini talab qilishlari lozim. Unvoni bo‘yicha kichiklar kattalarning bunday talablarini so‘zsiz bajarishlari shart¹.