5-mashg`ulot

Davlat grantlari va to`lov kontrakt usulidagi qabul deganda nima tushuniladi?

Yuqorida ta’kidlab o`tganimizdek, davlat ta’lim standartlari doirasida oliy ma’lumot olish mamlakatimizning har bir fuqarosi uchun ochiqdir. Bunday imkoniyat ikki yo`l bilan amalgam oshiriladi.

Birlamchisi – bu davlat grantlari, ya’ni talabalarning o`qish uchun zarur bo`lgan xarajatlarini davlat o`z zimmasiga oladi. Grantlar hududlarning ijtimoiy-iqtisodiy rivojlanishida oliy malakali kadrlarga bo`lgan ehtiyojdan kelib chiqib belgilanadi. Ta’kidlash joizki, Prezident Farmoniga asosan xalqaro va respublika fan olimpiadalari, xalqaro musobaqalar g`oliblari oliy o`quv yurtlariga test sinovlarisiz kirish huquqiga egadirlar.

Yoshlarimiz, o`z navbatida to`lov-kontrakt shaklida ham oliy o`quv yurtlarida o`qishlari mumkin. Bu nima degani? Oliy ma’lumot olish istagida bo`lgan yoshlar tegishli o`quv yurtlari ma’muriyatlari bilan shartnoma tuzadilar. Shartnomada har ikkala tomonning vazifalari belgilab olinadi. Talabalik safiga test sinovlari natijalari yoki grantlardan so`ng ballar ketma-ketligi (reyting) asosida qabul qilingan abiturientlar belgilangan miqdordagi mablag`ni oliy o`quv yurti hisobiga o`tkazadilar. Tegishli mablag`ni talaba uchun muassasalar, korxonalar, firmalar va boshqa tashkilotlar ham o`tkazishlari mumkin. To`lov-kontrakt shaklida o`qish qoidalari va shartlari davlat tomonidan mavjud qonunchilikka asoslangan holda belgilanadi.

Kontraktdan tushgan mablag`lar oliy o`quv yurtining moddiy-texnika negizini mustahkamlash, pedagog xodimlarni rag`batlantirish, talabalarni ijtimoiy qo`llab-quvvatlash va boshq maqsadlarda foydalaniladi.