Yoshlarda mafkuraviy immunitetni shakllantirish

TAYANCH ATAMALAR

“OMMAVIY MADANIYAT” – pop-madaniyat – mazkur jamiyatda aholining keng qatlamlari orasida yoyilib, ustuvor bo‘lgan madaniyat. U o‘z ichiga maishiy hayot, qiziqishlar (sport, pop-musiqa), ommaviy axborot vositalari kabilarni oladi.

Altruizm bag’rikenglikning bir ko’rinishi bo’lib, u jamiyatda qanchalik mustahkam o’rin olsa, mazkur jamiyatning rivojlanishi ham shunchalik jadal suratlarda kechadi. Olijanoblik, boshqalarning dardiga sherik bo’lish, boshqalarning tashvishlarini o’z tashvishlaridan ortiq deb bilish, boshqalarga yordam qo’lini cho’zishga doimo shay turish altruizmga xos xususiyatlar hisoblanadi.
ALTRUIZM- boshqalarning manfaatini o’z manfaatlaridan ustun deb bilish demakdir. Ushbu atama ilk bor frantsuz olimi Ogyust Kont tomonidan taxminan 150 yil ilgari muomalaga kiritilgan. Ogyust Kont boshqalarning baxt-saodati uchun yashashdan ko’ra ulug’roq baxt yo’q, deb ta’kidlagan edi.
Altruizm egoizm, ya’ni xudbinlikning aksi bo’lib, u yuksak ma’naviy-axloqiy qadriyat sifatida e’tirof etiladi. Aksariyat olimlar altruizmning ta’lim-tarbiya jarayonining mahsuli ekanligini ta’kidlaydilar hamda ta’lim-tarbiyani to’g’ri olib borgan taqdirdagina altruizmga erishish mumkin, deb hisoblaydilar.
AMORALIZM (amoralizm - lot, a - yo‘q, moralis-axloq) — ma’naviy hayot va shaxslararo munosabatda axloq meyorlarining buzilishi hamda ularni inkor etish, umume’tirof etilgan xulq-atvor mezonlariga e’tiborsizlik va ularga yengil-yelpi munosabatda bo‘lish.
AQIDAPARASTLIK (arab, ishonch) — shak keltirmasdan, muhokama qilmasdan bajarish, e’tiqod qilish lozim bo‘lgan qoida va talablar. Aqida qanday shaklda bo‘lmasin, muayyan ishonch va e’tiqod asosida shakllanadi.