Умумий ўрта таълим мактабларида синфдан ташқари ишлар” 1-мавзу: Умумий ўрта таълим мактабларида синфдан ташқари ишлар ва унинг мазмуни

“Умумий ўрта таълим мактабларида синфдан ташқари ишлар”
1-МАВЗУ: Умумий ўрта таълим мактабларида синфдан ташқари ишлар
Синфдан ташқари ишлар ва унинг мазмуни
Умумий таълим мактабларида ўқув куни якунланганидан сўнг синфдан ташқари вақтда ўтказиладиган жисмоний машқлар билан шуғулланиш машғулотлари, спорт ҳамда соғломлаштириш тадбирлари тизимини синфдан ташқари ишлар (СТИ) деб аташ қабул қилинган.
CТИнинг мақсади вазифалари
СТИнинг мақсади вазифалари ва уни ташкиллаш ўсиб келаётган ёш авлод жисми тарбияси ва унинг жисми маданияти учун қўйилган умумий мақсад, вазифалар билан мувофиқлаштирилган ва Ўзбекистон Республикасининг халқ таълими вазирлигини бир қатор услубий йўриқномалари, норматив ҳужжатлари, кўрсатмалари ва қарорлари билан регламентлаштирилган. Мактаб ёшидагилар жисмоний тарбиясининг умумий таркибий қисмини ташкилловчи, ўқув ишларини тўлдирувчи ва унга бўйсундирилган машғулотларнинг бундай шакллари ўқувчи жисмоний тарбияси жараёнини махсус ҳаётий зарурий билимлар, ҳаракат малакалари, кўникмалари билан бойитади. Энг аҳамиятли томони шундаки, бу машғулотлар ва тадбирлар ўқувчиларнинг қизиқишларига таяниб ва кўнгилли равишда, уларнинг хоҳишлари асосида тузилади ва бошқарув уларнинг инон-ихтиёрига берилади. Бу ўз навбатида ўқувчиларда ташаббус кўрсатиш, ўз фикрини жамоага ўтказиш ёки унинг акси, жамоанинг фикри билан ҳисоблашиш, лозим бўлса, унга бўйсуниш ҳамда жамоанинг жамоатчилик асосидаги ўзи хоҳлаган йўналишида фаолият кўрсатиш, жамоаси ёки ўз мактаби, тумани (шаҳри), вилояти, керак бўлса Республикаси шарафи учун курашиш, ҳимоя қилишдек ҳиссиётларни тарбиялайди.
СТИларни махсус машғулотлар тарзида ташкиллаш методикаси
СТИ ишларини ҳозирги кунгача махсус машғулотлар тарзида икки бўлимга бўлиб, уларни:
а) жисмоний тарбия-соғломлаштириш ишлари-жисмоний тарбия кружоклари (тўгараклари) даги, «Саломатлик» тести талаб нормаларини топширишга тайёрлаш гуруҳларидаги машғулотлар;
б) умумий жисмоний тайёргарлик секциялари (УЖТ) ёки умумий жисмоний тайёргарлик гуруҳлари, оммавий мусобақалар, жисмоний тарбия байрамлари, кечалари, ўқув куни таркибидаги жисмоний машқлар билан шуғулланиш машғулотлари деб СТИнинг бошқа қатор оммавий шаклларини четда қолдирганлар.