Pensiya ishi darslik i-qism toshkent-2020 Rustamov D. R., Tursunov J. P., Beknazarov Z. E

12.3-rasm. O’rtacha oylik ish haqini hisoblash tartibi
Pensiya miqdorining ko’p yoki kam bo’lishi pensiyaga chiquvchi shaxsning ishlagan davridagi olgan oylik ish haqiga va ishlagan yillariga bog’liqdir. Ish haqi haqida so’z borganda ish haqi yoki ish haqiga tenglashtirilgan to’lovlarning barchasi ham pensiya hisoblash uchun asos bo’ladigan daromad sifatida tan olinmaydi. Bunda asosan 2019-yil 1yanvarga qadar bo’lgan davr uchun – qonun hujjatlariga muvofiq sug’urta badallari hisoblanadigan mehnatga haq to’lash tarzidagi barcha daromadlar va 2019-yil 1-yanvardan keyingi davr uchun – qonun hujjatlariga muvofiq hisoblangan mehnatga haq to’lash tarzidagi barcha daromadlar qo’shiladi.
Shuningdek, o’qish davrida to’langan stipendiya pensiya so’rab murojaat etuvchining xohishiga ko’ra ish haqiga tenglashtiriladi.
Ish vaqtini hisobga olib bo’lmaydigan xodimlar (yakka tartibdagi tadbirkor va u tomonidan yollangan xodim, dehqon xo’jaligi va oilaviy tadbirkorlik subyekti a’zolari) ham mavjud bo’lib, ularning pensiyasini hisoblab chiqarish uchun olinadigan ish haqining miqdori:
− 2019-yil 1-yanvarga qadar bo’lgan davr uchun – O’zbekiston Respublikasi Moliya vazirligi huzuridagi byudjetdan tashqari Pensiya jamg’armasiga to’langan sug’urta badallarining miqdoridan;
− 2019-yil 1-yanvardan keyingi davr uchun – to’langan yagona ijtimoiy to’lov miqdoridan kelib chiqqan holda aniqlanadi.
Boshqa davlatlardan ko’chib kelgan, O’zbekiston Respublikasida ishlamagan fuqarolarga pensiyalar O’zbekistondagi tegishli kasb hamda malakadagi xodimlarning pensiya tayinlanayotgan vaqtdagi o’rtacha oylik ish haqiga asoslangan holda hisoblab chiqariladi. Shuningdek, chet elda yollanib ishlagan O’zbekiston Respublikasi fuqarolarining pensiyasini hisoblab chiqarish uchun olinadigan ish haqi 2019-yil 1-yanvarga qadar bo’lgan davr uchun –byudjetdan tashqari Pensiya jamg’armasiga to’langan sug’urta badallarining miqdoridan va 2019-yil 1-yanvardan keyingi davr uchun – to’langan yagona ijtimoiy to’lov miqdoridan kelib chiqqan holda aniqlanadi.