Moddiy yordam va ko‘makka muhtoj oilalarni, xotin-qizlar va yoshlarni ijtimoiy qo‘llab-quvvatlash bo‘yicha qo‘shimcha chora-tadbirlar to‘G‘risida

5-bob. “Temir daftar”dan chiqarish tartibi

18. Ijtimoiy ahvoli va turmush sharoiti og‘ir oilalar quyidagi hollarda “Temir daftar”dan chiqariladi:

bandligi ta’minlangan yoki doimiy daromad manbaiga ega bo‘lganda;

bir martalik moddiy yordam ko‘rsatish orqali muammosi hal etilganda oila a’zosining roziligi bilan;

malakali tibbiy xizmat ko‘rsatilganda;

to‘liq davlat ta’minotiga olinganda (“Mehribonlik”, “Saxovat” va boshqa ixtisoslashtirilgan muassasalarga o‘tkazilganda);

aniqlangan boshqa muammolari qonuniy hal etilganda;

yolg‘iz yashaydigan ehtiyojmand fuqaro ozodlikdan mahrum etilganda yoki vafot etganda;

oila a’zosining murojaatiga asosan;

“Temir daftar”ga noqonuniy kiritish holati aniqlanganda;

boshqa davlatlarga doimiy yashash uchun chiqib ketganda.

“Temir daftar”ga ikki va undan ortiq masalalarini hal etish uchun kiritilgan oilalarning barcha masalalari to‘liq hal etilishi daftardan chiqarish uchun asos bo‘ladi.

Doimiy va vaqtincha yashash uchun respublikaning boshqa hududiga ko‘chib o‘tganda, doimiy yashash va vaqtincha turar joyi bo‘yicha ro‘yxatga olingan kundan boshlab 15 kundan kechiktirmasdan “Temir daftar”ga tegishli o‘zgartirishlar kiritiladi.

19. Sektorlar rahbarlari mazkur Tartibning 18-bandida ko‘rsatilgan holatlar bo‘yicha “Temir daftar”dan chiqarish yuzasidan takliflarni xalq deputatlari tuman (shahar) Kengashlari muhokamasiga kiritadi.

20. Ijtimoiy ahvoli va turmush sharoiti og‘ir oilalarni “Temir daftar”dan chiqarish, unga o‘zgartirishlar kiritish xalq deputatlari tuman (shahar) Kengashining qarori asosida amalga oshiriladi.

21. Xalq deputatlari tuman (shahar) Kengashining qarori asosida “Temir daftar”dan chiqarilgan oilalar to‘g‘risidagi ma’lumotlar sektorlar shtablari kotiblari tomonidan 3 kundan oshmagan muddatda “saxovat.argos.uz” axborot tizimiga kiritiladi.

“Temir daftar”dan chiqarilgan oilalar sektorlar shtablari tomonidan 5 kun ichida bu haqda xabardor qilinadi.