Жиззах давлат педагогика институти эргашев жамшид бахтиёрович

Тадқиқотнинг республика фан ва технологиялари ривожлани-шининг устувор йўналишларига мослиги. Мазкур тадқиқот республика фан ва технологиялар ривожланишининг I. ”Демократик ва ҳуқуқий жамиятни маънавий-ахлоқий ва маданий ривожлантириш, инновацион иқтисодиётни шакллантириш” устувор йўналиши доирасида бажарилган.
Муаммонинг ўрганилганлик даражаси. Таълим тизимига ахборот-коммуникация ва замонавий педагогик технологияларни жорий этишнинг назарий ва амалий асослари, инновацион жараёнлар тамойиллари, қонуниятлари бўйича А.А.Абдуқодиров, М.М.Арипов, М.Ҳ.Лутфуллаев, Р.Ҳ.Жўраев, Б.Зиёмуҳамедов, Р.А.Мавлонова, Н.Тойлоқов, М.Тожиев, Ў.Толипов, Н.Сайидаҳмедов, М.Эргашев, У.Юлдашевлар, бўлажак ўқитувчиларни тайёргарлигининг назарий ва методик асослари Б.С.Абдуллаева, Ф.М.Закирова, Г.В.Злоцкий, Н.А.Муслимов, Ж.А.Толипова, Д.Юнусова каби олимларнинг илмий ишларида муайян даражада ўрганилган бўлиб, математикани ўқитишнинг методологик асосларини яратиш, математика ўқитувчисининг касбий-педагогик, методик тайёргарлиги ва касбий-педагогик ривожлантириш масалалари ёритиб берилган.
МДҲ олимлари Ю.В.Башкатова, Д.У.Байсалов, О.Е.Белова, И.Д.Зверов, В.Н.Максимова, В.Н.Фе­дорова, В.А.Гусев, В.А.Далингер, В.А.Извозчиков ва бошқаларнинг илмий тадқиқот ишларида олий таълим муассасаларида компьютер технологияларидан фойдаланишнинг психологик-педагогик ва методик жиҳатлари, таълим жараёнига янгиликларни киритишдаги психологик тўсиқларни енгиш, бўлажак ўқитувчини инновацион фаолиятга тайёргарлиги, инновацион таълим муҳитини шакллантириш, унинг мазмуни, воситаларини аниқлаш, математик фанлар интеграциясининг турли хусусиятлари бўйича муаммолар ўрганилган ва таълим жараёнига жорий этилган.
Хорижий олимлардан математикани ўқитишнинг ахборотлашган тизимларини яратиш ва жорий этиш масалалари J.Gilbert, F.Cochran, J.DeRuiter, R.E.Maeder, J.W.Gray, M.L.Dejong, M.Trott, R.J.Gaylordларнинг ишларида очиб берилган. Мазкур илмий изланишларда педагог кадрларни тайёргарлигининг турли жиҳатлари, яъни инновацион ва педагогик фаолиятга тайёргарлиги, таълимда ахборот-коммуникация технологияларидан фойдаланиш имкониятлари, интегратив муҳитни ташкил этиш масалаларига алоҳида эътибор қаратилган.
Диссертация тадқиқотининг диссертация бажарилган олий таълим муассасасининг илмий-тадқиқот ишлари режалари билан боғлиқлиги. Диссертация тадқиқоти Жиззах давлат педагогика институти илмий-тадқиқот ишлари режасининг №А1-ХТ-О-14297. “Ахборот-коммуникацион таълим муҳитида математика ўқитишнинг илмий-услубий асосларини яратиш” (2012-2014 йиллар) мавзусидаги амалий лойиҳаси доирасида бажарилган.