Автомобиль саноати корхоналарида маркетинг стратегияларини такомиллаштириш

Тадқиқотнинг вазифалари:
маркетинг стратегияси назарияларини ўрганиш ва автомобиль саноати корхоналари рақобатбардошлигини таъминлашда маркетинг стратегияларини тизимлаштириш;
автомобиль саноат корхоналари рақобатбардошлигини оширишда маркетинг стратегияларидан фойдаланиш бўйича хорижий мамлакатлар тажрибасини ўрганиш асосида улардан самарали фойдаланиш;
автомобиль саноат корхоналари учун маркетинг стратегияларни ишлаб чиқишнинг методологиясини шакллантириш;
Ўзбекистонда автомобиль саноатини ривожланиш ҳолатини, жаҳон бозоридаги нуфузини таҳлил қилиш асосида маркетинг стратегияларини жорий этишнинг ўзига хос хусусиятларини аниқлаш;
«Ўзавтосаноат» АЖ фаолиятини ривожлантириш бўйича маркетинг стратегиясини ишлаб чиқиш ва уни такомиллаштириш бўйича тавсия тайёрлаш;
автомобиль саноати корхоналари рақобатбардошлигини оширишда маркетинг стратегияларидан фойдаланиш йўлларини ёритиб бериш;
автомобиль саноати корхоналарида маркетинг стратегияларини жорий этишда ахборот-коммуникация технологияларидан фойдаланиш ва интернет маркетинг стратегияларини жорий этиш бўйича тавсия тайёрлаш;
автомобиль саноатида маркетинг стратегияларидан фойдаланиш истиқболлари: анъанавий сотиш каналлари ва рақамли маркетинг усулларини ишлаб чиқиш;
автомобиль саноатида маркетинг стратегияларидан фойдаланиш самарадорлигини аниқлаш.
Тадқиқотнинг объекти сифатида автомобиль саноати соҳасида фаолият юритаётган хўжалик юритувчи субъектларда амалга оширилаётган маркетинг стратегиялари танланган.
Тадқиқотнинг предмети сифатида автомобиль саноати корхоналарида маркетинг стратегиясини такомиллаштириш жараёнида юзага келувчи иқтисодий муносабатлар ҳисобланади.
Тадқиқотнинг усуллари. Тадқиқот давомида илмий абстракция, индукция ва дедукция, иқтисодий-математик моделлаштириш, эксперт баҳолаш, сўров, SWOT-таҳлил, корреляцион, регрессион таҳлил, омилли таҳлил (FIT индексли таҳлил) усулларидан фойдаланилган.
Тадқиқотнинг илмий янгилиги қуйидагилардан иборат:
автомобиль саноати корхоналарини мақсадли ривожлантиришнинг «глобал қиймат занжири (GVCs)» маркетинг стратегиясига тўрт босқичли маркетинг-микс, мақсадли сегментлаш ва технологик мослашувчанлик элементларини қўллаган ҳолда автомобиль саноатининг маркетинг стратегиясини ишлаб чиқиш тизими тавсия этилган;
автомобиль саноати корхоналарининг direct-marketing стратегияси истеъмолчилар буюртмаларини он-лайн қабул қилиш, сотишнинг эксклюзив усулидан фойдаланган ҳолда такомиллаштирилган;
автомобиль саноати корхоналарида харидорлар хулқ-атвори ўзгаришини аниқлаш ва бренд даражасини қўллаш асосида маркетинг стратегиялари самарадорлигини баҳолаш мезонлари такомиллаштирилган;
ўзаро манфаатли муносабатлар юритишда мижозларнинг хулқ-атвор ўзгаришларига оид ахборотлар билан бойитилган маълумотларни тўплаш ва қайта ишлаш имконини берувчи интеграциялашган тизимга (UzAuto System) асосланган ахборот тизими интернет ва рақамли маркетингдан фойдаланган ҳолда ишлаб чиқилган;
автомобиль саноати корхоналарида маркетинг стратегияларининг шаклланиш жараёнларини кўпомилли чизиқли регрессия модели орқали баҳолашнинг истиқболли йўналишлари ишлаб чиқилган.