Analitik kimyo

Asbobning tuzilishi

Asbobning metall g’ilofi ichiga (2 - rasm) quyidagi qismlar joylashtirilgan; fotometrik qism, elektr energiyasi bilan ta’minlovchi qism, doimiy tokni kuchaytirgich, rotametrlar tuguni. G’ilofning o’ng tomoniga atomlarni qo’zg’atuvchi qism o’rnatilgan.

Asbobning chapdagi yon devoriga tegishli yorug’lik filtrini (o’lchanayotgan elementni simvolini) o’rnatish uchun ruchka joylashgan. Orqa devoriga esa havo va tabiiy gazni ulash uchun ikkita shtuser, yerga ulash uchun klemma, elektr tarmog’iga ulash uchun kabel va saqlagich joylashtirilgan.

Asbobning old tomoniga (2 - rasm) uning elektr qismini boshqarish uchun ruchkalar, mikroampermetr, asbobga kelayotgan gaz-havo aralashmasi nisbatini (miqdorini) boshqarish uchun ruchkalar, parda va optik ponani tegishli joyga qo’yish uchun uzatmalar joylashtirilgan.

Qo’zg’atuvchi qism, tadqiq qilinayotgan eritmani aralashtirish kamerasiga purkaydigan 2 forsunkadan tashkil topgan. Asbobning ehtiyoj qismlari ichida kapilyar naylarining diametri 0.6, 0.89 va 1,01 mm bo’lgan uchta forsunka bor. Aerozol va gaz-havo aralashmasi aralashtirish kamerasidan yonish kamerasida joylashgan gorelkaga keladi. Gorelkaning holati 3 aylanma buragich orqali to’g’rilanadi.

Yonish kamerasi 6 metall g’ilofdan qilingan bo’lib uning ichiga qaytaruvchi ko’zgu, alangani kuzatish uchun 5 derazacha qo’yilgan. Alangani tashqaridan tushayotgan yorug’likdan himoya qilish uchun 4 g’ilof o’rnatilgan. Fotometr qismining qutisi ikkita bo’lmaga ajratilgan. Bitta bo’lmaga obyektiv, linzalar, panjara, interferension va yutuvchi yorug’lik filtrlari, qaytaruvchi ko’zgu va optik pona joylashtirilgan.

Ikkinchi, zich qilib yopilgan va ekran bilan to’silgan bo’lmaga kompensasiyalovchi va o’lchovchi fotoelementlar tuguni hamda qarshiliklar (rezistorlar) qismi joylashtirilgan.

Elektr toki bilan ta’minlovchi qism va doimiy tok kuchaytirgichi shassiga terilgan, u esa asbob qutisining ostiga mahkamlangan. Asbob qutisining orqa devori olinganda uning hamma qismlariga va elementlariga erkin kirish ta’minlanadi.

Kirish shtuserlaridan havo va gaz magistrallari ketadi. Gaz magistraliga gaz filtri ulangan. Havo magistralining havoni ko’paytirib ozaytirib to’g’rilaydigan 16 drosseli asbob old devorining orqasida joylashgan. Kirish shtuseri bilan to’g’rilaydigan drossel orasiga filtr qo’yilgan. Drossel vintini burash orqali havo oqimi forsunkaga va alangani puflash uchun taqsimlanadi.