1-mavzu. O‘zbekiston Respublikasida yuridik xizmatlar o‘quv fanining predmeti, uslublari va ahamiyati

2. Yuridik xizmat faoliyatini tartibga soluvchi qonunlar.

 

Yuridik xizmatning shartnomaviy munosabatlarning huquqiy jihatdan ta'minlanishini tashkil etish sohasidagi vazifalari va huquqlari O‘zbekiston Respublikasining 1998 yil 29 avgustdagi “Xo‘jalik yurituvchi sub'ektlar faoliyatining shartnomaviy-huquqiy bazasi to‘g‘risida”gi Qonunida aniq belgilab qo‘yildi.

Xo‘jalik yurituvchi sub'ektlarning moliyaviy-xo‘jalik faoliyatiga davlat organlari tomonidan asossiz aralashuvlarning oldini olish maqsadida bir qator normativ-huquqiy hujjatlar qabul qilingan bo‘lib, ularda ayniqsa nodavlat notijorat tashkilotlari tomonidan ko‘rsatiladigan yuridik xizmatga alohida e'tibor qaratilgan.

Jumladan, O‘zbekiston Respublikasi Vazirlar Mahkamasining 1998 yil 27 noyabrdagi 496-son Qarori bilan tasdiqlangan “Xo‘jalik yurituvchi sub'ektlar moliya-xo‘jalik faoliyatini tekshirish va taftish qilishni o‘tkazish Tartibi”da kichik va o‘rta biznes korxonalarining, Tovar ishlab chiqaruvchilar va tadbirkorlar palatasi a'zolarining ishlab chiqarish va moliya faoliyatlarini barcha tekshirishlar Palata va uning hududiy tuzilmalari yuridik xizmatlarining majburiy ishtirokida amalga oshirilishi qayd qilingan.

O‘zbekiston Respublikasi Oliy Majlisi tomonidan 2000 yil 14 dekabrda qabul qilingan “Normativ-huquqiy hujjatlar to‘g‘risida”gi O‘zbekiston Respublikasi qonunida normativ-huquqiy hujjatlarning loyihalari huquqiy ekspertizadan o‘tkazilishi shartligi, huquqiy ekspertiza normativ-huquqiy hujjat loyihasini tayyor-lagan organning yoki normativ - huquqiy hujjatni qabul qiladigan organning yuridik xizmati, shuningdek, O‘zbekiston Respublikasi Adliya vazirligi tomonidan amalga oshirilishi mumkinligi belgilangan.

1997 yil 30 avgustda qabul qilingan “O‘zbekiston Respublikasi qonunlarini tayyorlash to‘g‘risida”gi Qonunning 3-moddasida qonun loyihalarini tayyorlashga xalq xo‘jaligi tegishli tarmoqlarining yuridik xizmatlari jalb qilinishi ko‘rsatib o‘tildi. Bu bilan yuridik xizmatning qonun ijodkorligidagi ishtiroki qonun darajasida mustahkamlandi.

Amaldagi qonunchilikka muvofiq xo‘jalik yurituvchi sub'ektlarga yuridik xizmat faqatgina ularning yuridik bo‘limlari tomonidan emas, balki ayrim davlat organlari, advokatura hamda nodavlat notijorat tashkilotlari tomonidan ham ko‘rsatiladi. qo‘yilgan.