Guliston davlat universiteti filologiya fakulteti

27-mashq.
Ma’lumki, hayot qarama-qarshiliklardan iborat, undagi bir taqdir ikkinchisiga sira o’xshamaydi. Lekin inson baribir umid va ishonch bilan yashaydi. Hamma joyda – yoru do’stlar bilan suhbatlarda, televizor qarshisida, xizmat kursisida, sayxu sayohatda, shodu xurram kezlarimizda, g’ussali, uyqusiz kechalarda – xullas, qaerda bo’lmaylik, ongu shuurimizni band etgan behisob savollarga javob axtaramiz.
Afsuski, ko’pincha ularga javob topmoq mushkul. Ammo javob topmoq istagi, toki tirik ekanmiz, bizni tark etmaydi.
Shu istak bizni mutolaaga undaydi. Hayot muammolari haqidagi so’roqlarga avvalo kitoblardan echim izlaymiz. Aynan kitob bizni manqurtga aylanib qolish balosidan ogoh qiladi, biz aslida kimmiz, dunyo bunchalar bezovta, nechun bir-birimizga ishonmay qo’ydik, nechun odamlar o’rtasida mehr-oqibat ko’tarilib bormoqda, degan azaliy savollar ustida bosh qotirishga majbur etadi.
Farxod Hamroev. «Tafakkur» jurnali 1997y 1-son 64-bet
28-mashq.
E’tiqodsiz odam boyligini nimaga sarf etadi? Turgan gapki, be’mani ishlarga: ikki-uch qavatli imoratga, qo’sha-qo’sha mashinaga, be’huda bazmi jamshidga… Bu ishlarni amalga oshirish jarayonida u zimdan o’z e’tiqodsizligini targ’ib etadi. Ya’ni boshqalarga, sizlar men kabi bee’tiqod, beiymon bo’lsalarining edi, dunyoning bor noz-ne’mati oyoqlaring ostida yotardi, degandek bo’ladi. Buning aksi o’laroq e’tiqodli odam boy-badavlat bo’lib qolsa, boyligini e’tiqod-iymon yo’lida sarf etadi. Zero, inson tabiati shunday: qani, hamma men kabi bo’lsa, deya orzu qiladi. Buning vositasi topildi deguncha amaliy faoliyatga kirishadi. Boylik esa vositadir…
Murtazo Qarshiboy «Tafakkur» jurnali 1997y 1-son 5-6-bet
11-amaliy mashg’ulot
Gap bo’laklarining o’rni
Ajratilgan vaqt – 2 soat
Darsning maqsadi: talabalarning gap bo’laklarining odatdagi tartibi va uning o’zgarish sabablari to’g’risidagi bilimlarini mustahkamlash, ularda mazmunga muvofiq holda gap bo’laklarini o’zgartirish ko’nikmasini hosil qilish.