Guliston davlat universiteti b. A. Xasanov, A. A. Xashimov, A. B. Muxametov, A. A. Abduvohidov buxgalteriya hisobi

Kontragent - bir biriga nisbatan shartnomadagi tomonlarning har biri.
Kontraktatsiya - tayyorlovchi, qayta ishlovchi sanoat korxonalari (kontraktantlar) va qishloq xo‘jalik mahsulotlarini ishlab chiqaruvchilar (beruvchilar) o‘rtasidagi ikki yoqlama shartnoma. Ushbu shartnomada ishlab chiqariladigan qishloq xo‘jalik mahsulotining miqdori, sifati va etkazish shartlari hamda muddatlari kelishib olinadi.
Kontrafakatsiya - boshqa kompaniya mahsulotlarini namoyon etib bo‘lgan tovar belgilaridan boshqa firmalarning foydalanishi. Kontrafakatsiya natijasida xaridorlar tovarning kelib chiqish manbaiga ikkilanib qarashadi. Manfaati buzilayotgan korxona esa, shu davlatda o‘rnatilgan qonunchilikdan kelib chiqib, o‘z huquqini himoya qilish tadbirlarini qo‘llashi mumkin.
Kontsern - mulkchilik va nazorat birligiga asoslanuvchi birlashish shakli. Kontsernga kiruvchilar mustaqillikka ega bo‘lmay, kontsernni boshqaruvchi bosh tashkilot tomonidan nazorat qilinadi. Kontsern ishtirokchilari bir vaqtning o‘zida boshqa kontsernlar tarkibiga kirishi mumkin emas.
Kontsessioner - kontsessiya egasi, yuridik shaxs bo‘lib, kontsessiya olgan bo‘ladi.
Kontsessiya - 1. Davlat yoki munitsipial hukumat, xususiy tadbirkorlar, xorijiy firmalar bilan tabiiy boyliklardan, korxonalardan, er va boshqalardan chegaralangan muddatda foydalanish yuzasidan tuzilgan shartnoma. 2. Kontsessiya tartibida tashkil etilgan korxona.
Kooperativ - birgalikda mahsulotlarni ishlab chiqarish va sotish, tovar va xizmatlarni sotib olish va iste’mol qilish, uy-joylarni qurish va ulardan foydalanish va boshqalar maqsadida shaxslarning birlashishi.
Kosmopolis - qurilish texnikasi, arxitektura, ekologiya fani, informatika va kommunikatsiya mablag‘larining mukammal darajasiga asoslangan shahar qurilishi va infratuzilmalarining yaxlit kontseptsiyasi.
Korrektura (lat. correcto - tuzatish) - hisob-kitob yozuvlaridagi xatolarni tuzatish usuli. Bu usulda xato yozuv ko‘riladigan, o‘qib bo‘ladigan qilib o‘chiriladi va uni yoniga kerakli yozuv aks ettiriladi. Tuzatilgan xato buxgalteriya registrini yurgizuvchi javobgar shaxs imzosi bilan tasdiqlanadi. Bunda tuzatishga ishonish mumkinligi yoziladi. Bu usul bir necha hisob registrlarida yo‘l qo‘yilgan xatolarni tuzatish uchun ishlatilmaydi. (qo‘shimcha buxgalteriya yozuvi-stornoga qarang).
Kotirovka - fond birjasida qimmatbaho qog‘ozlarga kurs belgilash; tovar birjasida tovarlar bahosi va ularning birja byulletenlarida yozilishi, tegishli davlat organlari yoki valyuta birjalarida xorijiy valyutalariga kurs belgilash. To‘liq kotirovka xaridor va sotuvchilar kursini o‘zida aks ettirib, unga ko‘ra, kotirovka qiluvchi xorijiy valyutani, qimmatbaho qog‘ozni yoki tovarni sotib oladi yoki sotadi. Xaridor va sotuvchilarning kurslari o‘rtasidagi farq kotirovka qiluvchining daromadini bildiradi, hamda shu daromad hisobiga kelishuvning amalga oshirilishi bilan bog‘liq xarajatlar qoplanadi. To‘g‘ri kotirovkada xorijiy valyutaning ma’lum bir miqdori kotirovka qiluvchining milliy pul birligiga tenglashtiriladi. Xorijiy valyutaning egri kotirovkasida milliy valyuta birligi xorijiy pul birligining ma’lum bir miqdoriga tenglashtiriladi.