Gidrogeologiya fanining mazmuni va vazifalari

Gidrоgеоlоgiya fanining maqsadi va vazifalari. Hozirgi paytda gidrogeologiya fani quyidagi mustaqil bo‘limlardan iborat:

1. 
   Umumiy gidrogeologiya — yer osti suvlarining paydo bo‘lishi, yotish va tarqalish sharoitlari, fizik xususiyatlari va kimyoviy tarkibini o‘rganadi.
   
2. 
   Yer osti suvlari dinamikasi — yer osti suvlarining harakat qonuniyatlari, suv inshootlariga, tog‘ inshootlariga suvning kelishi, gidrotexnik va sug‘orish kanallarini qurishda grunt suvlarining ta’sirini o‘rganadi.
   
3. 
   Gidrogeologik tadqiqot uslublari — yer osti suvlarini qidirish va izlash asoslarini ilmiy ishlab chiqish bilan shug‘ullanadi, yer osti suvlari rejimi va balansini o‘rganadi. Shu jumladan, dala gidrogeologik tajriba tadqiqotlarini, suv ta’minoti, gidrotexnik inshootlar, shaxtalar va boshqa qurilish gidrogeologik tadqiqotlarini o‘z ichiga oladi.
   
4. 
   Foydali qazilmalar gidrogeologiyasi — aniq foydali qazilmalar gidrogeologik sharoitlarini o‘rganadi, yer osti suvlarining tog‘ inshootlariga ta’sirini aniqlash, tog‘ kovlash ishlarini olib borishda yer osti suvlariga qarshi kurash chora-tadbirlarini tashkil etish kabi masalalarni yechadi.
   
5. 
   Regional gidrogeologiya — ma’lum hududda, masalan, O‘zbekiston Respublikasi hududida, yer osti suvlarining tarqalish qonuniyatlarini o‘rganadi.
   
6. 
   Mineral va sanoat suvlari — shifobaxsh yer osti suvlarini va sanoat uchun ahamiyatli suvlarning (osh tuzi, yod, brom va shunga o‘xshash boshqa kam uchraydigan elementlar olinadigan suvlar, yuqori haroratli suvlar) paydo bo‘lish va tarqalish qonuniyatlarini o‘rganadi.
   
7. 
   Gidrogeokimyo — yer osti suvlarining kimyoviy tarkibini, mavjud kimyoviy elementlarning paydo bo‘lishini, suvda ko‘chishini (migratsiya) o‘rganadi. Yer osti suvi tarkibidagi turli radioaktiv elementlarni esa — radiogidrogeologiya o‘rganadi.
   

Sayyoramizdagi ba’zi bir davlatlarda suv ta’minotida ancha muammolar bor. Toza sifatli chuchuk ichimlik suvlari bo‘lmagan davlatlar ham yo‘q emas. Shuning uchun suvni qadrlab, avaylab asrashimiz, undan oqilona foydalanishimiz zarur.