G. Q. Hasanova, Z. B. Jalilov

Mavzuni takrorlash va mustahkamlash uchun savollar hamda topshiriqlar:

1. 
   Bitiruv malakaviy ishiga qo‘yiladigan umumiy talablarni tushuntiring.
   
2. 
   Bitiruv malakaviy ishni bajarishning maqsad va vazifalarini ayting.
   
3. 
   Bitiruv malakaviy ishlarning mavzusini tanlash tarbini izohlang.
   
4. 
   Bitiruv malakaviy ishi mavzusini tanlashda rahbar va talaba qaysi jihatlarga e’tibor berishi lozim?
   
5. 
   Bitiruv malakaviy ishni bajarishga rahbar tanlash tartibini tushuntiring.
   
6. 
   Bitiruv malakaviy ishning tarkibi qaysi qismlardan iborat bo’ladi?
   
7. 
   Bitiruv malakaviy ishini bajarishda zaruriy manbalar nimalardan iborat bo‘lishi mumkin?
   
8. 
   Bitiruv malakaviy ishining tarkibi va mazmunini yoritish qoidalari haqida ma’lumot bering.
   
9. 
   Bitiruv malakaviy ishining kirish qismida qaysi ma’lumotlar joy olishi lozim?
   
10. 
    Bitiruv malakaviy ishlarini amaliyotga hamda o‘quv jarayonlariga qo‘llanilishini izohlang.
    
11. 
    Bitiruv malakaviy ishini rasmiylashtirish tartibini tushuntiring.
    

13-MAVZU. BITIRUV MALAKAVIY ISHLARGA RAHBAR XULOSASINI TAYYORLASH, BITIRUV MALAKAVIY ISHLARIGA TAQRIZ TAYYORLASH VA ULARNI BAHOLASH.

Tayanch iboralar: bitiruv malakaviy ish, rahbarlik qilish, rahbar xulosasi, ichki taqriz, tashqi taqriz, dastlabki himoya, baholash mezoni, DAK xulosasi.
13.1. Bitiruv malakaviy ishlarga rahbar xulosasi va taqrizlarni tayyorlash. BMIni dastlabki himoyaga kiritish
Belgilangan tartibda rasmiylashtirilgan bitiruv malakaviy ishi himoya kunidan 5 kun avval jildlanmagan holda ilmiy rahbarga taqdim etiladi. Rahbar 5 kun ichida malakaviy ishni o‘rganib chiqishi va unga o‘z xulosasini berishi shart.
Xulosani yozish bo‘yicha ilmiy rahbar uchun eslatma
Ilmiy rahbar xulosasi tasdiqlangan shalkda tuzilib, ilmiy rahbar imzosi hamda fakulьtet yoki universitet muhri bilan tasdiqlanadi. Xulosada quyidagi jihatlarga e’tibor berish lozim:

• 
  mavzuning dolzarbligi;
  
• 
  ishning mundarijasi tasdiqlangan mavzu va topshiriqqa muvofiqligi;
  
• 
  qarorning sifati, asoslanganligi va to‘g‘riligi hamda qo‘yilgan masalaning to‘liq o‘rganilganlik darajasi;
  
• 
  bitiruvchining tashabbuskorligi va mustaqilligi;
  
• 
  topshiriqning to‘liq bajarilgan diqqatga sazovor bandini ko‘rsatish;
  
• 
  ishda o‘ziga xos, original qarorlarning mavjudligi;
  
• 
  ishning to‘liq va muayyan qismlaridagi ijobiy va salbiy
  

jihatlari;

• 
  bitiruvchining mavzu bo‘yicha bilimi va ularni amaliyotda qo‘llay olish qobiliyati;
  
• 
  izoh va grafiklarning rasmiylashtirilish sifati;
  
• 
  loyihada standartlar talablariga rioya qilinganligi;
  
• 
  ish natijasining amaliyotga qo‘llanilishi mumkinligi darajasi;
  
• 
  BMIni himoyaga tavsiya etish mumkinligi;
  
• 
  ishning sifati yuzasidan umumiy baho (ish yuqori, o‘rta, quyi darajada bajarilgan);
  
• 
  4 balli tizimda loyihani baholash (a’lo, yaxshi, qoniqarli, qoniqarsiz).
  

Ilmiy rahbar malakaviy ishning talab darajasida bajarilganligiga ishonch bildirgandan so‘ng, ishni o‘z taqrizi, tashqi taqriz, BMIga berilgan topshiriq, annotatsiya, o‘quv jarayoni va amaliyotga joriy etish dalolatnomalari bilan birga kafedra mudiriga taqdim etadi. Taqrizda talabaning faolligi, qabul qilingan qarorlardagi yangiliklar va malakaviy ishning boshqa ijobiy (yoki salbiy) tomonlari tavsiflanadi.
Ilmiy rahbar bitiruv malakaviy ish belgilangan talablarga javob bermasligiga ishonch hosil qilsa va talaba kamchiliklarni bartaraf etishdan bo‘yin tovlasa ishni dastlabki himoyaga tavsiya etmasligi ko‘rsatilgan salbiy taqriz berishi ham mumkin.
Kafedra mudiri taqdim etilgan materiallar asosida, malakaviy ishni talaba tomonidan dastlabki himoyaga kiritish haqida qaror qabul qiladi. Agar, kafedra mudiri talabaning malakaviy ishini dastlabki himoyaga kiritish mumkin emas deb hisoblasa, masala kafedra majlisida, rahbar ishtirokida muhokama etiladi.
Kafedra mudiri bitiruv malakaviy ishlar dastlabki himoyasini qabul qiluvchi maxsus komissiya tarkibini kafedra majlisiga taqdim etadi va majlis tasdiqlagan komissiya dastlabki himoyani o‘tkazadi.
Dastlabki himoyani qabul qilgan komissiya xulosasi bayonnoma (protokol) bilan rasmiylashtiriladi (bayonnoma shakli ilova qilinmoqda). Bayonnomada dastlabki himoyaga kiritilgan talabaning ismi-sharifi, BMIning mavzusi, uning asosiy natijalari va kamchiliklari, himoyada talabaga berilgan savollar, savollarga talaba bergan javoblarning natijalari qayd etiladi. Komissiya bitiruv malakaviy ishining dastlabki himoyasi natijalari asosida uni DAKda himoya qilishga kiritish yoki kiritmaslik haqida qaror qabul qiladi.