Г. И. Мухамедов 2021 йил Тошкент вилояти Чирчиқ давлат педагогика институти ҳузуридаги dsc

Диссертация ишининг илмий-тадқиқот ишлари режалари билан боғлиқлиги. Диссертация иши Ўзбекистон Республикаси Президентининг 2019 йил 8 октябрдаги ПФ-5847-сон “Ўзбекистон Республикаси олий таълим тизимини 2030 йилгача ривожлантириш концепциясини тасдиқлаш тўғрисида” ги Фармони мазмунига тўла мос келади. Тадқиқот иши Жиззах давлат педагогика институти «Информатика ва уни ўқитиш методикаси» кафедрасининг илмий тадқиқотлар олиб бориш режаси асосида амалга оширилган.
Тадқиқот мақсади: педагогика олий таълим муассасаларида инновацион методик лойиҳалар асосида талабалар мустақил таълимини ташкил этишда мобил ўқитиш тизимидан фойдаланиш методикасини ишлаб чиқишдан иборат.
Тадқиқот вазифалари: педагогика олий таълим муассасалари информатика ўқитиш методикаси таълим йўналиши талабаларининг мустақил таълимини ташкил этишнинг замонавий воситаси сифатида мобил қурилмалардан фойдаланиш заруриятини асослаш;
тадқиқот мавзусига оид илмий адабиётларни таҳлил қилиш, мобил технологияларнинг дидактик имкониятлари ва улардан фойдаланиш усулларини аниқлаш мақсадида таълим жараёнида мобил қурилмалардан фойдаланиш бўйича маҳаллий ва хорижий тажрибаларни ўрганиш;
талабаларнинг мустақил таълим фаолиятини мобил ўқитиш тизимлари асосида ташкил этишга оид илмий-методик тавсиялар ишлаб чиқиш;
ишлаб чиқилган методиканинг самарадорлигини текшириш учун тажриба–синов ишларини ташкил этиш ва ўтказиш.
Тадқиқот объекти: педагогика олий таълим муассасалари “Информатика ўқитиш методикаси” бакалавриат таълим йўналишида “Web-дизайн” фанини ўқитиш жараёни.
Тадқиқот предмети: педагогика олий таълим муассасаларида “Web-дизайн” фани бўйича талабалар мустақил таълимини ташкил этишда мобил ўқитиш тизимларини қўллаш шакл, усул ва воситалари.
Тадқиқотнинг усуллари. Тадқиқотда мавзуга оид фалсафий, социологик, психологик-педагогик адабиётларни қиёсий ўрганиш ва таҳлил қилиш, ижтимоий-педагогик (кузатиш, суҳбат, ташхислаш, сўровнома, тест), тажриба-синов, мониторинг натижаларини математик ва статистик қайта ишлаш методларидан фойдаланилди.