Funkcionallıq analiz

“Funkcionallıq analiz” kafedrası 2008-jılı Joqarı hám orta arnawlı bilimlendiriw ministrligi Joqarı oqıw orınları bas basqarması baslıǵı I.Majidovtıń 1-noyabrdegi №87-01/1-441-sanlı xatı, Qaraqalpaq mámleketlik universiteti Ilimiy Keńesi májilisiniń 12-noyabr 2-sanlı bayanlaması qararı hám de Qaraqalpaq mámleketlik universiteti rektorı A.T.Matchanovtıń 13-noyabr №180 k/2-sanlı buyrıǵı menen jańadan ashılıp, kafedra baslıǵı etip f.-m.i.d. K.K.Kudaybergenov bekitildi. 2014-jılı “Funkcionallıq analiz, algebra hám geometriya” kafedrası bolıp qayta shólkemlestirildi. 2020-jıldıń iyul ayınan baslap kafedranı f.-m.i.k. T.K.Kurbanbaev basqarıp kelmekte.

Kafedrada tiykarǵı shtatta on tórt professor-oqıtıwshı bar bolıp, olardan prof. K.Kudaybergenov hám doc.J.Seypullaevlar – ilim doktorları, doc.X.Allambergenov hám doc.T.Kurbanbaevlar – ilim kandidatları, K.Begjanova, doc.I.Allambergenov, doc.F.Abdikalikov hám doc.A.Alauadinovlar – PhD ilimiy dárejelerine iye. Sonıń menen birge kafedrada ilimiy izertlew jumısların jáne de rawajlandırıw máqsetinde akademik SH.Ayupov, professor A.Abdishukurov, professor B.Omirov hám Avstraliyanıń Jańa qubla Uels universiteti professorı F.Sukochevlar saatpay esabında lekciya sabaqların ótiwge tartılģan bolıp, olar kafedra ilimiy seminarında da bayanatlar islep kelmekte.

2018-2021 jılları kafedra professor-oqıtıwshıları tárepinen ilimiy izertlew jumısları nátiyjeli alıp barılıp, kafedra professor-oqıtıwshılarınan K.Begjanova, F.Abdikalikov, hám A.Alauadinovlar fizika-matematika ilimleri filosofiya doktorı (PhD), I.Allambergenov pedagogika ilimleri filosofiya doktorı (PhD) dissertaciyaların qorǵaǵan bolsa, docent J.Seypullaev fizika-matematika ilimleri doktorı (DSc) dissertaciyasın tabıslı qorǵadı.

Házirgi kúnde kafedra professor-oqıtıwshıları tárepinen Funkcionallıq analiz, Itimallıqlar teoriyası hám matematikalıq statistika, Sızıqlı operatorlar teoriyası, Abstrakt algebra, Sızıqlı algebra, Analitikalıq geometriya, Differenciallıq geometriya hám topologiya, Joqarı matematika pánlerinen lekciya hám ámeliy sabaqlar oqıtılıp kelmekte.

Kafedrada professor K.Kudaybergenov basshılıǵında «Operatorlar algebraları hám onıń qollanıwları», «Funkcionallıq analizdiń zamanagóy máseleleri» atamasında hár hápteniń juma kúni kafedra professor-oqıtıwshıları hám ziyrek studentelerdiń qatnasıwında ilimiy seminar úzliksiz jumıs alıp barmaqta.

Ilimiy izertlew jumıslarınıń nátiyjeleri boyınsha sońǵı 2018-2021 jıllar aralıģında 70 ten aslam ilimiy maqala hám tezisler, sonnan 40 tan aslamı abıraylı sırt el jurnallarında baspadan shıģarıldı. Kafedra professor-oqıtıwshıları tárepinen 20 ģa jaqın oqıw hám oqıw-metodikalıq qollanbalar basılıp shıǵarılģan bolıp, házirgi kúnde studentlerimiz oqıw barısında bul kitaplardı keńnen paydalanbaqta.

Kafedrada ruwxıylıq hám aǵartıwshılıq jumısları boyınsha da bir qatar jumıslar ámelge asırılmaqta. Ǵárezsizlik bayramı, 8-dekabr Ózbekstan Respublikasınıń Konstituciyası, 14-yanvar Ózbekstan respublikası Qurallı kúshleri, 8-mart xalıq-aralıq hayal-qızlar kúnlerine baylanıslı, xalqımızdıń milliy bayramı Nawrız bayramlarına arnalǵan kesheler úzliksiz ótkerilip kelmekte. Bul keshege jası úlken professor-oqıtıwshılarımız, nuranıy aǵa-apalarımız mirát etilip, olarģa dasturxanlar jayılıp, materiyallıq hám ruwxiy jaqtan xoshemetlenip, fakultet student jasları tárepinen koncert baģdarlamaları shólkemlestiriledi.

Kafedranıń jas oqıtıwshıları tolıģı menen shaxmat-shashka, futbol, boleybol hám tennis boyınsha fakultetler arasında ótkeriletuģın sport jarıslarında belsene qatnasıp joqarı nátiyjelerge erisip kelmekte.