Фуқаролар йиғинлари раислари (оқсоқоллари)

17.05.2022 йил санасида Чуст тумани “Резаксой” маҳалла фуқаролар йиғинида ўтказилиши лозим бўлган маҳалла фуқаролар йиғини раиси (оқсоқоли) сайлови юзасидан
МАъЛУМОТ
17.05.2022-йил санасида Чуст тумани “Резаксой” маҳалла фуқаролар йиғинида раис (оқсоқол) сайлови режалаштирилган бўлиб, сайлов ўтказилиш жойи, куни, аниқ вақти (соат 15:00) кўрсатилган таклифномалар фуқароларга тарқатилган. Сайлов ўтказиш учун фуқаролар йиғинига чақирилган вакиллар миқдори умумий вакиллар(265 нафар)нинг 3 дан 2 қисми (181 нафар)ни ташкил этган.
Аммо йиғилган вакиллар орасидан бир гуруҳи номзодлардан бири (Муродов Абдуманнон Абдураззоқович) олий маълумотли эмаслигини иддао қилиб сайловда қатнашмай кетиб қолишган.
Натижада сайловни ўтказиш учун етарли даражада кворум бўлмаганлиги сабабли сайловлар бошқа кунга (24-май) қолдирилган.
Ушбу жараён ҳақида туман кўмаклашувчи комиссиясининг вакили, ҳудуд депутати – Ж.Юлдашев хабар бергач, номзод – Муродов Абдуманнон Абдураззоқовичнинг ҳужжатлари шахсан ўзим томонимдан кўриб чиқилди. Номзод томонидан “Резаксой” маҳалласига сайлов ўтказувчи ишчи гуруҳга тақдим этилган ҳужжатларида маълумоти олий эканлиги ҳақида ёлғон маълумот берилганлиги маълум бўлди.
Ҳозирда ушбу ҳудудга олий маълумотли бошқа номзодлар рўйхати ҳам олиниб, уларга туман ҳокими томонидан тегишли хулосалар берилди. Номзодлар рўйхати қайтадан маҳалла гузарларига илиб қўйилди.
Чуст туманида “Фуқаролар йиғини раиси (оқсоқоли) сайлови тўғрисида”ги Ўзбекистон Республикаси қонунинг 17-моддаси талабларидан келиб чиқиб маҳалла фуқаролар йиғини раиси лавозимига 100 фоиз олий маълумотли номзодлар рўйхати шакллантирилган.
Бутун масъуллар томонидан қатъий режа асосида сайловларни тартибли ва шаффоф тарзда ўтказишга ҳаракат қилинмоқда.
Фуқаролар йиғинлари раислари (оқсоқоллари)
сайловини ташкил этиш ва ўтказишга
кўмаклашувчи туман комиссияси раиси С.Ахатжонов