Fizika” fanidan laboratoriya ishlarini bajarish bo‘yicha

FIZIK KATTALIKLARNI O‘LCHASH VA XATOLIKLAR KLASSIFIKATSIYASI HAQIDA QISQACHA MA’LUMOTLAR

1. Fizik kattaliklarni o‘lchash. Biror-bir kattalikni o‘lchash deganda bu kattalikning birlik sifatida qabul qilingan bir jinsli etalon kattalik bilan solishtirilib, undan necha marta katta yoki kichikligini bilish tushuniladi. Fizik kattaliklarni absolyut aniq o’lchab bo’lmaydi. Fizik kattaliklarni o‘lchash jarayonida o‘lchov jihozlarining tuzilishiga hamda kuzatuvchining sezgi o‘rganlarining sezgirligiga bog‘liq ravishda o‘lchash natijalari ma’lum xatoliklar bilan aniqlanadi. Topilgan natijalar o‘lchanayotgan kattaliklarning taqribiy qiymatini beradi. O‘lchashda ro‘y beradigan xatoliklar ikki guruxga bo‘linadi: sistemali va tasodifiy xatoliklar.
a) Sistemali xatoliklar. Bunday xatoliklar odatda tajriba o‘tkazilguncha aniqlanishi mumkin bo‘lgan xatoliklardir. Ular asosan ishlatiladigan jihozlarning ayrim kamchiliklari tufayli yuz beradi va ayni bir kattalikni takroriy o‘lchashlar jarayonida ularning qiymatlari doimo bir xil bo’ladi. Masalan, masshtabli chizg’ich shkala bo‘limlarining bir xil emasligi, kapillyar naycha diametrining uning turli qismlarida turlicha bo‘lishi, elektr o‘lchov jihozlari strelkalarining nol qiymatidan siljib qolganligi va x.k.lar sistemali xatoliklarning paydo bo‘lishiga sabab bo‘ladi. Sistemali xatoliklardan ko‘p xollarda ularni o‘lchov jihozi ko‘rsatishiga tuzatma sifatida hisobga olish yo‘li bilan yoki o‘lchov jihozlarini etalon o‘lchov jihozlari bilan solishtirish natijasida qutilish mumkin.
b) Tasodifiy xatoliklar o‘lchash jarayonining turli bosqichlariga ta’sir etuvchi alohida sabablar oqibatida paydo bo‘ladigan xatoliklardir. Masalan, o‘lchov jihozlarining ko‘rsatishidagi noaniqliklar, sezgi organlarimizning nomukammalligi va tashqi (temperatura, bosim, namlik va x.k.) muhitning o‘lchash jarayoniga uzluksiz ta’siri tufayli paydo bo‘ladigan xatoliklar shular jumlasidandir. Bu xatoliklarni tajriba oldidan e’tiborga olishning imkoniyati yo‘q. Bunday xatoliklarni butunlay yo‘qotib bo‘lmaydi, lekin ularning sonini minimal qiymatgacha kamaytirish mumkin. Tasodifiy xatoliklarning ehtimollik qonuniyatlariga bo‘ysunishi ularning o‘lchanayotgan kattalikning xaqiqiy qiymatini o‘z ichiga oladigan chegaraviy qiymatlarini aniqlash imkonini beradi.