Farmasevtikada boshqaruv fanidan o‘quv-uslubiy majmua

O‘zbekiston Respublikasi farmasevtik bozorida dori vositalarini qalbakilashtirishning oldini olish chora-tadbirlari
Hozirgi paytda O‘zbekiston farmasevtika bozoriga sifatsiz dori vositalari kirib kelishini oldini olish maqsadida bir qator chora-tad-birlar qabul qilingan. O‘zbekiston Respublikasi Vazirlar Mahkamasining 5 dekabr 2002 yildagi 427-sonli “O‘zbekiston Respublikasiga iste’mol tovarlari olib kelishni takomillashtirish chora-tadbirlarini amalga oshirish to‘g‘risida ” qarori va “Dori vositalarini sertifikatlashtirish qoidalari” bu yo‘nalishdagi asosiy hujjatlar bo‘lib hisoblanadi.
Iste’molchilar xuquq va manfaatlarini himoyalash, aholini sifatli va bezarar dori vositalari bilan ta’minlashning yagona davlat siyosatini amalga oshirish maqsadida 2003 yil 1 yanvardan boshlab O‘zbekiston Respublikasida dori vositalarining muvofiqlik sertifikati joriy etildi. Faqat muvofiqlik sertifikatiga ega bo‘lgan dori vositalarigina O‘zbekiston Respublikasi hududida sotilishiga ruxsat etiladi. Dori vositalarining belgilangan sifat standartlariga muvofiqliginitekshirish va muvofiqlik sertifikatini berish uchun “Dori vositalari ekspertizasi va standartlash Davlat markazi” qoshida Markaziy sertifikatlashtirish idorasi tashkil etildi. Uning filiallari viloyatlarda tashkil etilib, quyidagicha joylashtirildi: Andijonda, (Farg‘ona, Andijon, Namangan viloyatlari uchun), Urganchda (Xorazm viloyati va Qoraqalpog‘iston Respublikasi uchun), Samarqandda (Samarqand, Navoiy, Buxoro viloyatlari uchun), Qarshida (Qashkadaryo va Surxondaryo viloyatlari uchun). Shu yo‘l bilan respublikaga nostandart dori vositalarini kiritilishiga o‘ziga xos to‘siq qo‘yiladi.
Lekin, majburiy sertifikatlashtirish hamma muammolarning yechimi bo‘la olmaydi. Farmasevtik bozorda qalbaki mahsulotlarning kirib kelishini oldini olishning samarali usullarini o‘z ichiga olgan bir qator chora tadbirlarni ishlab chiqish kerak. Hozirgi kunda qalbaki dori vositalari haqidagi axborotlar ommaviy axborot vositalari (radio, televidenie, matbuot) yordamida mutaxassislarga muntazam ravishda yetkazilayapti. Dori vositalarini qalbakilashtirish muammosi yechimini alohida davlatlarning nazorat organlari bilan hamkorlikda hal qilish mumkin.