«fаlsаfа» modulidan oʼquv-uslubiy mаjmuа

Estetik did – bu bizning predmet yoki hodisadan oladigan qoniqish yoki qoniqmaslik haqida hukm chiqarish qobiliyatimizdir. estetik did kishining umumiy madaniyatiga, uning aqli va tuygʼusining rivojlanishiga bogʼliq, uni shuning uchun ham tarbiyalash, rivojlantirish mumkin. Bunda sanʼatning estetik didni, shakllantiradigan eng yaxshi namunalari alohida rol oʼynaydi. estetik did hamma vaqt individualdir. Kimgadir U.Hayyom ruboyilari yoqsa, kimgadir А.Yassaviy hikmatlari...
Estetik baho – bu predmet va hodisalarni tushunib, dadil, ishni bilgan holda, estetik qiymati va kamchiliklari haqida hukm chiqara olishdir. Nimagadir yoki kimgadir estetik baho berish goʼzallik qonunlari haqida oʼz bilimini aniq va ongli ravishda qoʼllash, mazkur predmet, hatti-harakat, inson nima uchun goʼzal yoki xunuk ekani haqidagi tushunchani namoyon etishdir. estetik baho boshqa baholardan farqli oʼlaroq, hodisalarni yaxlit qamrab oladi. Masalan: «Аʼlochi talaba» desak, biz uning bilimiga, «haqiqiy doʼst» desak, axloqiga baho bergan boʼlamiz. «Аjoyib inson» degan baho-haqiqiy estetik bahodir.
Estetik ideal – bu kishilarning hayotda va kishining oʼzida mukammal boʼlgan va orzu qilingan narsa haqidagi tasavvuri. Bu faqat eng yaxshi ijtimoiy tuzum haqidagi (siyosiy ideal) va eng adolatli jamiyat haqida (axloqiy ideal)dagi tasavvurgina emas. Bu kishilar, ularning muhit, atrof-muhit, kishilarning oʼzaro munosabatlari goʼzal boʼlgan yaxlit, eng yaxshi hayot haqidagi tasavvurlaridir. Kishilar ongidagi estetik ideal amalda yuzaga chiqishi kerak boʼlgan goʼzallik obrazi tarzida mavjud. Estetik qarashlar voqelikning estetik tomonlarini his-tuygʼu, yordamida idrok etish, ularni tushunchali anglashdan oldin sodir boʼladi. Nafosat, oliyjanoblik, fojiali, kulgili, sanʼatning mohiyati va burchi masalalarni qamrab olgan estetik qarashlar va nazariyalar estetik ongning barcha qismlariga taʼsir oʼtkazadi. estetik his-tuygʼular, didlar, ayniqsa orzular xususiyati koʼp jihatdan estetik qarashlar va nazariyalarga bogʼliq boʼladi.