Ф. М. Закирова, Ш. Х. Позилова инновацион таълим технологиялари ва педагогик компетентлик

1­- МАЪРУЗА. ИННОВАЦИОН ФАОЛИЯТ — ОЛИЙ ТАЛИМ МУАССАСАСИ ЎҚИТУВЧИЛАРИ ВА ТАЛАБАЛАРИНИНГ БИЛИМ САВИЯСИНИ ЮКСАЛТИРИШ ОМИЛИ СИФАТИДА
Режа:
1.1. Инновацион фаолият тушунчаси.

2. 
   Инновацион фаолият турлари ва субъектлари.
   
3. 
   Олий таълим муассасаларида инновацион фаолиятни йўлга қўйиш.
   

Маълумки, мамлакатимизда илмий-тадқиқот ишларининг самарадорлигини ошириш, ижтимоий ва иқтисодий ривожланиш ва демократик янгиланиш жараёнида фаннинг ролини кучайтиришга қаратилган кенг кўламли ишлар амалга оширилмоқда. Бу соҳада олиб бораётган кенг миқёсли ишларимизни, хусусан, таълим-тарбия бўйича қабул қилинган умуммиллий дастурларимизни мантиқий якунига етказишимиз зарур.

Шу мақсадда Ҳукуматнинг, тегишли вазирлик ва идоралар ҳамда бутун таълим тизимининг, жумладан, профессор-ўқитувчиларнинг энг муҳим вазифаси - ёш авлодга пухта таълим бериш, уларни жисмоний ва маънавий етук инсонлар этиб тарбиялашдан иборатдир.⁴
Айниқса, инновация ва инновацион фаолиятни ривожлантириш ҳамда такомиллаштириш, янги илмий ишланмаларни рағбатлантириш борасида етарли тажриба тўпланган. Инновацион фаолият – якунланган илмий тадқиқот ва лойиҳалар натижалари ёки бошқа илмий-техник ютуқларни (фан-техника ютуқларини) янги ёки такомиллаштирилган маҳсулотга; бозорда сотиладиган, амалий фаолиятда фойдаланиладиган янги ёки такомиллаштирилган технологик жараёнга, шунингдек, шу билан боғлиқ қўшимча илмий тадқиқот ва лойиҳаларга жорий қилишга йўналтирилган жараёндир.
2006 йил 7 августдаги “Фан ва технологиялар ривожланишнинг мувофиқлаштириш ва бошқаришни такомиллаштириш чора-тадбирлари тўғрисида”ги Ўзбекистон Республикаси Президентининг Қарори ва 2007 йил 7 сентябрдаги “Инновация илмий-техника дастурларини шакллантириш ва амалга ошириш тартиби тўғрисидаги низомни тасдиқлаш ҳақида”ги Ўзбекистон Республикаси Вазирлар Маҳкамаси ҳузуридаги Фан ва технологияларни ривожлантиришни мувофиқлаштириш қўмитасининг, Ўзбекистон Республикаси молия вазирлигининг, Ўзбекистон Республикаси Олий ва ўрта махсус таълим вазирлигининг, Ўзбекистон Республикаси Иқтисодиёт вазирлигининг, Ўзбекистон Республикаси Фанлар Академиясининг Қарорида қуйидаги таъриф таклиф этилади: ”Инновацион фаолият – янги ёки такомиллаштирилган маҳсулот, янги ёки такомиллаштирилган технологик жараён яратиш, ишлаб чиқаришда ўзлаштириш ва амалий қўллаш бўйича ишлар бажариш ва хизматлар кўрсатиш”.