Estetik tarbiya bolaning ijodiy qobiliyatini rivojlantirishda, hayotdagi va san’atdagi go’zallikni tushunish va qadrlashni bilishida, ma’naviy dunyosini boyitishida katta rol o’ynaydi

Estetik tarbiya bolaning ijodiy qobiliyatini rivojlantirishda, hayotdagi va san’atdagi go’zallikni tushunish va qadrlashni bilishida, ma’naviy dunyosini boyitishida katta rol o’ynaydi. Ota-onalar bolalarga tabiatdagi, ijtimoiy hayotdagi, san’atdagi go’zallikni his qilish va shu kabilarni o’rgatadilar. Kichkintoy uyqudan turishi bilan atrof-muhitdagi turli narsalarga ko’zi tushadi. Ota-ona bu narsalarning chiroyliligini tushuntirib berishi, o’g’il yoki qizining kiygan kiyimlari chiroyli va qulayligiga, xonaki o’simliklar va bahor gullarining naqadar chiroyliligiga ahamiyat berib qarashga o’rgatishi kerak. Estetik didni tarbiyalashda dastlabki o’yin-choqlar juda katta rol o’ynaydi. Ular hayotni bilishni o’rgatadi va birinchi estetik taassurotlar manbai hisoblanadi. Ota-ona bolalarni xonalarni yig’ishtirish, saranjom-sarishta qilishga jalb qilib, ularda estetik didni tarbiyalaydi. Estetik tarbiyaning asosi oilada bolalarni ijod qilish (badiiy tarbiya)ga o’rgatishdir.
Bolalarning rasm chizishga bo’lgan ehtiyoji juda erta, ya’ni 1,5—2 yoshdan boshlab uyg’onadi. Ota-ona o’z bolalariga rasm chizishdagi muayyan ko’nikmalarni egallashda yordam berishi kerak. Bola tabiat, turmush va o’qigan kitoblaridan olgan taassurotlarini rasmda ifoda etishni yaxshi ko’radi. Bu undagi rasm chizishga bo’lgan qobiliyatidan darak beradi. Uning bu ishi qo’llab-quvvatlansa, bola ruhlanib san’atning bu turini egallashga harakat qiladi.
Bolada yoshlikdan musiqa eshitish uquvini o’stira borish unda nozik his-tuyg’uning shakllanishiga imkon beradi. Kichkintoy juda yoshlikdanoq musiqa ohangiga qarab ritmik harakatlar qiladi. Bu undagi dastlabki estetik did-tuyg’u, iste’dod kurtagidir. Ota-ona boladagi bu harakatlarni yanada rivojlantirishi va unga ko’proq ahamiyat berishi lozim.
Bolaning tashqi ko’rinishiga bo’lgan talablar estetik tarbiyada katta ahamiyatga egadir. Sodda va ozoda kiyina bilish, kishilar orasida o’zini yaxshi tutish, xulq-atvorning yaxshi bo’lishi ham go’zallikdir. Gapirish, kulish, salomlashish, madaniyatli xayrlashish, minnatdorchilik bildirish kabi odatlar ham bolaning yoshlikdan nazokatli, nafosatli bo’lib o’sishiga imkon beradi. Tabiiyki, ota-ona farzandning nozik did va farosatli, odob va axloqli bo’lib o’sishiga erishish uchun avvalo o’zi barcha go’zalliklarni seza bilishi va sevishi, badiiy adabiyotlar o’qishi, san’atning turli sohasida o’z bilim va taassurotlarini kengaytirib borishi kerak.