Educational materials

 
Iqtisodiy tahlilning mohiyati va maqsadi 
Loyiha O’zbekiston milliy iqtisodiyotining ustuvor yo’nalishlariga va 
iqtisodiy xavfsizligiga javob berishi kerak. Shuning uchun iqtisodiy tahlil 
investitsiya loyihasini umumjamiyat manfaati nuqtai nazaridan o’rganadi. Iqtisodiy 
tahlil loyihalarga kengroq yondashib, daromad va xarajatlarni baholashda 
moliyaviy tahlildan farq qiladi. Umuman, bu tahlilda daromadlar-xarajatlar 
oqimini baholashda moliyaviy tahlilga qaraganda ikki katta o’zgarishga yo’l 
qo’yiladi.
Birinchidan, investitsiya loyihasini amalga oshirish bilan bog’liq bo’lgan 
ishlab chiqaruvchilar olgan subsidiyalar soliq to’lovchilarning yo’qotishlari bilan 
qoplanib ketsa, ayrim shaxslardan tushadigan to’lovlar umummilliy darajada 
resurslar miqdorini o’zgartirmaydi. Ikkinchidan, bir loyihani amalga oshirish 
ikkinchi bir loyiha uchun resurslar miqdori kamayishiga olib kelishi mumkin. 
Misol uchun, Samarqand viloyatida 15000 tonna pomidor etishtiriladi. Evropa 
texnologiyasida qayta ishlangan pamidor tomat pastasi, agar 220 kg lik asseptek 
qoplarga qadoqlansa va Evropaning ISO-9001 sertifikati bilan kafolatlansa, loyiha 
valyuta keltiruvchi loyihaga aylanadi.
Agar shunday zavod mavjud bo’lsayu, uning talabi 12000 tonna pomidorni 
qayta ishlashga mo’ljallangan bo’lsa, demak, keyingi loyihaga faqat 3000 tonna 
pomidor qolyapti. qo’shimcha zaxiralar bilan yana 5000 tonna pamidor etishtirilsa 
ham ikkinchi turdosh korxonaning loyihasiga xom ashyo taqchil bo’ladi. Bu holda 
ikkinchi loyiha o’zi bilan bir xil bo’lgan birinchi loyihaga konfliktli loyiha deb 
baholanishi mumkin. Bundan xulosa shuki, birinchi loyihaning amalga oshirilishi 
ikkinchi loyihani moliyalashtirishni samarasiz qilib qo’yadi. Bu holda 
umumjamiyat nuqtai nazaridan iqtisodiy daromad moliyaviy daromaddan past 
bo’ladi va buni loyiha bo’yicha ish boshlashdan oldin xisobga olish zarur. 
Moliyaviy tahlilda foydali deb baholangan loyiha o’zining salbiy ekologik yoki 
ijtimoiy oqibatlari tufayli iqtisodiy tahlilda foydasiz deb baholanishi mumkin. 
Loyihaning ekoligik jihatlari bilan bog’liq iqtisodiy xarajatlar xisobga 
olinganda ko’p hollarda u samarasiz bo’lib qolishi mumkin. Loyihaning 
ekologiyaga salbiy ta’sirini oldini olish uchun tozalash inshootlari qurishga to’g’ri 
keladi. Bu holda investitsiya xarajatlari ko’payadi va loyihaning samaradorligi 
pasayadi. Natijada loyiha samarasiz deb xisoblanishi mumkin. Moliyaviy tahlil va 
iqtisodiy tahlil o’rtasidagi farqlarni quyidagicha keltirish mumkin: 
1. Moliyaviy tahlilda daromad va xarajatlarga nisbatan alohida bozor baholari 
qo’llaniladi. 

---

Iqtisodiy tahlilda muqobil ijtimoiy qiymatlar (daromadlar va xarajatlarga 
nisbatan yashirin baholar, ekologik daromad va xarajatlar, foydalinilmayotgan yoki 
to’la foydalanilmayotgan ishlab chiqarish omillari) qo’llaniladi. 
2. Moliyaviy tahlilda kapital xarajatlar loyiha xizmat muddatiga taqsimlab 
chiqiladi (amortizatsiya). 
Iqtisodiy tahlilda esa kapital xarajatlar foydalanish (ishlatilish) yilidagi bir 
marotabalik xarajat summasi sifatida xisobga olinadi. 
3. Moliyaviy tahlilda soliqlar va turli guruhlar o’rtasidagi boshqa bir 
tomonlama to’lovlar xisobga olinadi. Iqtisodiy tahlilda esa bu to’lovlar va soliqlar 
jamiyat ichidagi transfert to’lovlari bo’lgani uchun xisobga olinmaydilar. 
4. Moliyaviy tahlilda diskontning xususiy stavkasi qo’llaniladi. 
Iqtisodiy tahlilda loyihalar bo’yicha daromadlar va xarajatlar oqimlarini 
daromad darajalariga ko’ra guruhlar bo’yicha o’rganiladi. 
Umuman olganda, iqtisodiy tahlil loyihaning xomiylariga ham, boshqalarga 
ham ta’sirini o’rgangan holda u jamiyat uchun qanchalik foydali ekanligini, uni 
amalga oshirish uchun jamiyat nuqtai nazaridan resurs ajratish qanchalik maqsadga 
muvofiqligini tekshiradi. 
Daromadlar va xarajatlarni iqtisodiy tahlil qilish resurslardan samaraliroq 
foydalanish maqsadida iqtisodiy tanlash muammosini qulay va tushunarli izoxlash 
usulidir. Har bir mamlakat u yoki bu maxsulotni ko’p ishlab chiqara oladi. Lekin 
bir yo’la hamma maxsulotni ko’p ishlab chiqarib bo’lmaydi. Shu sababli 
resurslardan foydalanishning turli variantlaridan birini tanlashga to’g’ri keladi. 
Minimal xarajatlar bilan maksimal natijalarga erishishni ta’minlaydigan qilib 
investitsiyalashga erishgan mamlakatgina o’z resurslaridan oqilona foydalanishni 
ta’minlay oladi.
Iqtisodiy tahlil maqsadi loyiha bilan bog’liq barcha samaralarni ko’rib chiqish 
uchun umumiy asos yaratishdir. Bunga: 
1. Bozor bitimlaridan o’z aksini topadigan iqtisodiy o’zgaruvchilarni aniqlash 
(masalan, uy bahosi u joylashgan xudud sifatini-transport, maktab kabilarning 
yaqinligini, uy-joy arxitekturasining urf bo’lgan turini, xonalar sonini aks ettiradi); 
2. Loyihaning turli belgilarini baholashga aholi munosabatini aniqlash uchun 
loyihaning 
foydali 
tomonlarini 
harakterlovchi 
ko’rsatkichlarga 
pulda 
ifodalanmaydigan qiymatlarni kiritish;
3. Loyihalarni bevosita o’lchanadigan boshqa xarajatlari hamda natijalarini 
taqqoslash imkonini beruvchi chizmalarni ishlab chiqish yo’li bilan erishiladi. 
Bular asosida loyihadan olinadigan manfaat unga sarflangan xarajatdan 
oshish-oshmasligi to’g’risida murakkab qarorga kelinadi. Bunda manfaat 
(daromad) va xarajatlar yagona o’lchov birligida ifodalanadi. 
Loyihani qabul qilish, loyiha bo’yicha iste’mol qilinadigan resurslardan 
foydalanish borasidagi muqobil variantlardan xech biri mamlakat oldida turgan 
vazifalar nuqtai nazaridan bundan yuqoriroq natija bermasligini anglatadi. 
Iqtisodiy tahlil ya’ni daromadlar va xarajatlarni tahlil qilish usullari 3-bobda 
aks ettirilgan. Bunda NPV, PI, IRR, CC, PP, ROI kabi ko’rsatkichlari xisoblanadi. 

---