Djumayeva n

3.3.Guruh murabbiysining oila va jamoatchilik hamkorligida

olib boradigan pedagogik faoliyati
O‘quv yurtining oila va keng jamoatchilik bilan aloqasi guruh murabbiysi orqali amalga oshiriladi. Guruh murabbiysi ota-onalar bilan olib boradigan ishlarida quyidagi vazifalarni hal qiladi:

1. Ota-onalar bilan yaqindan aloqa o‘rnatadi va aloqani doimo mustahkamlab boradi.

2. Talabaga nisbatan o‘quv yurtining va oilaning yagona talablar qo‘yishga erishadi.

3. Guruh ota-onalar jamoasini tashkil etib, ularning guruhdagi tarbiyaviy ishlariga faol qatnashishlarini ta’minlaydi.

4. Ota-onalar o‘rtasida pedagogik bilimlarni tarqatadi va ularning pedagogik madaniyatini yuqori darajaga ko‘taradi.

5. Guruhga otaliq qilayotgan tashkilotlar, oila va o‘quv yurtiga yordam beruvchi tashkilotlar bilan aloqa o‘rnatadi va ularni guruhdagi tarbiyaviy ishlarga jalb qiladi.

Guruh murabbiysining talabani yaxshi tarbiyalashdagi oila va jamoatchilik bilan hamkorligining muvaffaqiyati ularning bola bilan qilayotgan ishlari haqida bir-birlariga qanchalik ko‘p, aniq va muntazam xabar berib turishlariga bog‘liq. Ana shu maqsadda guruh murabbiysi oilaga bir qator tizimli axborotlar berib turishi kerak:

- Talabaning o‘quv mehnatiga tavsifnoma, o‘qishdagi muvaffaqiyati va muvaffaqiyatsizligi, ularning sabablari, olayotgan baholari.

- Talabaning ijtimoiy faolligi haqida axborotlar, talabaning jamoa hayotidagi ishtiroki nimalardan iborat ekanligi, jamoat topshiriqlari va vazifalarning bor-yo‘qligi sababi, ularga o‘zining munosabati.

- Talabaning o‘z o‘rtoqlari, o‘qituvchilari bilan munosabatida vujudga kelgan holatlarning xarakteri, o‘quv yurtidagi munosabatlarning doirasi.

- Talabaning ayrim hatti-harakatlarini tahlil qilib, ularga pedagogik izohlar berish. Oilaga talaba tarbiyasi haqida maslahat va tavsiyalar. Oila ham o‘z navbatida farzandi haqida o‘z mulohazalari, kuzatishlari yuzasidan guruh murabbiysiga quyidagi mazmunda ma’lum axborotlar berib borishi mumkin:

- Farzandi uyga berilgan vazifalarni qanday bajaradi, unga sarflaydigan vaqti, dars tayyorlash tartibi, mustaqillik darajasi.

- Belgilangan kun tartibining talaba tomonidan bajarilishi.

- Talabaning o‘quv yurta haqidagi hikoyalari, taassurotlari, gaplari, guruh hayotidagi turli voqealarga baholari.

- Ota-onaning ayrim o‘qituvchilardan, guruh murabbiysidan, o‘quv yurti rahbarlaridan iltimoslari va takliflari.

Guruh murabbiysi bilan oila o‘rtasidagi bu xildagi o‘zaro xabarlashuvlar talabani to‘la o‘rganishga, ta’lim va tarbiyada shu talaba uchun eng maqbul tarbiya va ta’sir vositasini topishga yordam beradi. Guruh murabbiysi o‘z kuzatishlari, oiladan olgan axborotlari natijasini kundalikka yozib borsa, undagi to‘plangan ma’lumotlarni vaqti-vaqtida o‘rganish bilan shularga asoslanib, tegishli xulosalar chiqarsa, bola xulqini va fazilatlarini yaxshilash yo‘llari, keyingi rejalarni belgilasa, erishilgan darajani hisobga olib yangi pedagogik talablar qo‘yilsa, tarbiya albatta, samarali natija beradi.

Guruh murabbiysining tajribasida ota-onalar yig‘ilishlari keng tarqalgan va qaror topgan ish shaklidir. Bu yig‘ilishlar guruh ota-onalar jamoasining yuqori organi sifatida o‘z qarorlari bilan guruhdagi, oiladagi va turar joylardagi amalga oshiriladigan tarbiyaviy ishlarning vazifasini va yo‘nalishini belgilab beradi.

Guruh ota-onalar yig‘ilishlarining bir necha xili mavjud: guruhdagi tashkiliy ishlar bilan bog‘liq hamda ota-onalarga pedagogik ma’lumot berishga bag‘ishlangan yig‘ilishlar, shuningdek, munozara shaklidagi va yarim yillik yoki yil yakuniga bag‘ishlangan yig‘ilishlar ham mavjud. Bu yig‘ilish-larning har biri aniq maqsad, tayyorlash va o‘tkazish tartibiga ega.

Tashkiliy masalalar bilan bog‘liq guruh ota-onalari yig‘ilishida, odatda, ota-onalar guruhi saylanadi, ish rejalari tasdiqlanadi, ota-onalar o‘rtasidagi vazifalar taqsimlanadi. Ko‘pgina o‘quv yurtidagi guruh murabbiysining ota-onalar bilan olib borayotgan ishlari tajribasida savol-javob kechalari, maslahatlar va munozaralar ham vujudga kelmoqda.