Дефектологларнинг иш фаолиятини ташкил этиш бўйича ЙЎРИҚнома умумий тушунча

Мактабгача таълим муассасасида
дефектологларнинг иш фаолиятини ташкил этиш бўйича
ЙЎРИҚНОМА


1. Умумий тушунча
1.1. Мазкур Йўриқнома мактабгача таълим муассасаларида дефектолог (логопед) лар ишини ташкил этишга қаратилган бўлиб, унинг асосий вазифасига нутқи, эшитиши ва кўришида енгил нуқсонлар бўлган болалар билан коррекцион-педагогик ишни олиб боришга қаратилади.
1.2. Дефектолог ўзининг иш фаолиятида Ўзбекистон Республикаси Конституцияси, “Таълим тўғрисидаги Қонун”и, Вазирлар Маҳкамасининг 2010 йил 18 июндаги “Давлат махсус мактабгача таълим муассасаларининг фаолиятини такомиллаштириш чора-тадбирлари тўғрисида”ги 117-сонли қарори, «Бола ҳуқуқлари тўғрисида Конвенция», мактабгача таълим муассасасининг Устави, мактабгача ёшдаги болаларнининг ҳаёти ҳавфсизлигини муҳофаза қилиш Йўриқномаси асосида иш олиб боради.
1.3. Нутқи, эшитиши ва кўришида енгил камчиликларга эга бўлган болаларга мўлжалланган мактабгача таълим муассасаларида коррекцион-педагогик ишни ташкил қилиш кўзда тутилади.
Коррекцион-педагогик ишларга қуйидагилар киради:
болаларни ўз вақтида текшириш;
машғулотлар жадвалини оқилона тузиш;
ҳар бир бола билан олиб бориладиган индивидуал ишни режалаштириш;
кичик гуруҳли машғулотларни режалаштириш;
машғулотларни керакли жиҳозлар ва кўргазмали қуроллар билан таъминлаш;
дефектологнинг тарбиячи ва ота-оналар билан ўзаро ҳамкорлик қилиши орқали машғулотлар мустаҳкамланади.
1.4. Дефектолог ўқув йили бошида муассасада тарбияланаётган 3-6 ёшдаги барча тарбияланувчиларни 15 кун давомида психологик-педагогик текширувдан ўтказади. Ривожланишида камчилик ёки нуқсонлари бўлган болаларни аниқлайди, рўйхатини тузади ва тиббий мутахассислар хулосасини тўплайди (мудира томонидан бир йилда икки марта (сентябр-май). Шартнома асосида қуйидаги мутахассисларни жалб қилиш лозим: яшаш жойидаги психоневролог, дефектолог, оториноларинголог, офтальмолог шифокорларнинг хулосаси).
Тўпланган хулосаларни муассаса қошида ташкил этилган тиббий-психологик-педагогик комиссия кўриги ташкил қилинади ва хулосаларни тақдим этади.
Муассаса қошида ташкил этилган тиббий-психологик-педагогик комиссия аъзолари томонидан кўрик натижаси асосида коррекцион-педагогик ёрдамга муҳтож болалар рўйхати тузилади ва тасдиқланади. Қолган коррекцион-педагогик ишига муҳтож бўлган болаларни навбатга қўяди.
Муассаса қошида ташкил этилган тиббий-психологик-педагогик комиссия аъзолари томонидан тасдиқланган коррекцион-педагогик ишига тақдим қилинган болалар рўйхати туман тиббий-психологик-педагогик комиссияга олиб борилади ва тасдиқланади. Қуйидаги рўйхат асосида дефектолог штат бирлиги келиб чиқади.