Давлат мукофотига номзод

2. Маркетинг назариясида тадқиқотларнинг тутган ўрни ва тамойиллари
Дарҳақиқат, иқтисодиёт тармоқларини диверсификациялаш, ишлаб чиқаришни ривожлантирган ҳолда экспорт ҳажмини оширишда замонавий корхоналар фаолиятини устувор ривожланишини таъминлаш ҳамда бу соҳада маркетинг фаолиятини такомиллаштириш ўз ечимини кутаётган масалалардан бири ҳисобланади. Авваламбор, тармоқ корхоналари фаолиятида биринчи навбатда “маркетинг” тушунчасини кенг тарғиб қилиш ва унинг назарий аҳамиятини янада ошириш орқали корхона фаолиятида ўз бозорини кенгроқ ўрганишига муҳим замин яратади. Бироқ, бугунги кунда мамлакатимиздаги йирик иқтисодиёт тармоқларида фаолият юритаётган корхоналар қаторида кичик бизнес ва хусусий тадбиркорлик субъектларининг ҳам роли ортиб бормоқда. Шу жиҳатдан олиб қараганда барча турдаги корхоналарнинг асосий вазифаларидан бири бу – маркетинг тушунчасини тўлиқ англаб етишлари ва амалда қўллашлари муҳим аҳамият касб этади.
Корхоналар фаолияти ривожланишида учун доимий тарзда маркетинг тадқиқотларини самарали ташкил этиш ва ишлаб чиқариш ёки хизматлар кўрсатишда татбиқ этиш мақсадга мувофиқдир. Бу борада машҳур маркетолог олим Ф.Котлернинг “маркетинг – бу истеъмолчиларнинг муаммоларини тушуниб етишни тартиблаштирилган ва мақсадга йўналтирилган жараёни ҳамда бозор фаолиятини бошқариш” деган таърифи катта аҳамиятга эга.
Бироқ, иқтисодчи олим Ф.Котлернинг фикрини ҳисобга олган ҳолда хулоса қиладиган бўлсак, хўжалик юритувчи субъектлар фаолиятида маркетингнинг асосини маркетинг тадқиқотлари ташкил этади, деб айтиш мумкин. Аммо, ҳозирги кунда кўплаб корхоналар ўз фаолиятида маркетинг тадқиқотларини бозор ва истеъмолчилар ҳақида ахборот йиғиш ва уни таҳлил қилишдан ташқари, ишлаб чиқариш ёки хизмат кўрсатиш жараёнидаги муаммоларни ҳам ўрганишлари ва унинг ечимини имкон доирасида топишга қаратишлари лозим. Иқтисодиётни модернизациялаш ва диверсификациялаш шароитида “маркетинг тадқиқоти” тушунчасига замонавий ёндашган ҳолда маркетинг тадқиқотлари – бу ҳар қандай корхонанинг бозорни ўрганиш асосида маҳсулот ишлаб чиқариш ва сотиш фаолиятини бошқариш” деб таърифлашимиз мақсадга мувофиқ.